عوامی مسلم لیگ کے سربراہ شیخ رشید  نے پیشگوئی کی ہے کہ 20 روز میں حالات ایسے ہونگے کسی کو کال نہیں دی جائے گی عوام خود سڑکوں پر ہونگے۔

شیخ رشید نے اسلام آباد میں میڈیا سے گفتگو کرتے ہوئے کہا کہ پولیس کی پوری کوشش ہے کہ مجھے گرفتار کیا جائے،  پولیس کی طرف سے میرا میڈیا ٹرائل کیا گیا۔

میں اپنے بیان پر قائم ہوں

انہوں نے کہا کہ میں اپنے بیان پر قائم ہوں، عمران خان نے جو بیان دیا ہے کہ آصف زرداری ایک منصوبے کے ذریعے قتل کروانا چاہتے ہیں۔

شیخ رشید نے کہا کہ آصف زرداری عمران خان کو دہشت گرد تنظیم کے ذریعے قتل کروانا چاہتے ہیں، آصف زرداری اقتدار میں طوالت چاہتے ہیں۔

انکا کہنا ہے کہ لال حویلی پر انہوں نے قبضہ کیا جو میری ملکیت ہے، 16 وزراتوں میں سے کچھ نہیں ملا تو لال حویلی کے ساتھ ملحکہ بند کردیے۔  ہمارے جیل میں جانے سے کوئی فرق نہیں پڑتا۔

حالات خراب ہورہے ہیں

انہوں نے کہا کہ آرمی چیف نے کہا معاشی استحکام ہی سلامتی کی ضمانت ہے، آرمی چیف نے کہا پاکستان نازک ترین موڑپر پہنچ گیا،  حالات خراب ہورہے ہیں، 20 روز بعد عوام خود سڑکوں پر ہونگے۔

سابق وفاقی وزیر داخلہ نے مزید کہا کہ میری نشست پر بھی عمران خان الیکشن لڑیں گے، ان کے ڈبوں میں سے ہوں کی آواز آئے گی۔

شیخ رشید نے تھانہ آبپارہ کے طلبی نوٹس کو چیلنج کردیا

دوسری جانب سابق وفاقی وزیر داخلہ شیخ رشید نے تھانہ آبپارہ کے طلبی نوٹس کو اسلام آباد ہائی کورٹ میں چیلنج کردیا۔

شیخ رشید کے وکیل نعیم حیدر پنجوتھہ اور انتطار حسین پنجوتھہ کی جانب سے نوٹس غیر قانونی قرار دینے کے لیے اسلام آباد ہائی کورٹ میں درخواست دائر کی گئی ہے۔

شیخ رشید کی جانب سے دائر کی گئی درخواست میں مدعی، ایس ایچ او اور آئی جی کو فریق بتایا گیا۔

درخواست میں موقف اختیار کیا گیا ہے کہ وزیر داخلہ رانا ثناء اللہ کی جانب سے تھریٹس بھی مل رہی ہیں۔ پولیس کو ایف آئی آر سے پہلے اس طرح نوٹس کا اختیار نہیں، پولیس نے غیر قانونی طریقے سے نوٹس جاری کیا۔

درخواست میں استدعا کی گئی کہ پولیس کو ہراساں کرنے سے روکا جائے اور نوٹس کو کالعدم قرار دیا جائے۔

واضح رہے کہ تھانہ آبپارہ نے شیخ رشید کو عمران خان قتل الزام لگانے سے متعلق طلب کیا تھا۔