وفاقی وزیر آئی ٹی سید امین الحق نے کہا ہے کہ کسی بھی ویب سائٹ کی بندش سے قبل وزارت آئی ٹی سے مشاورت لازمی ہو گی۔

تفصیلات کے مطابق وکی پیڈیا کی بندش پر وفاقی وزیر آئی ٹی سید امین الحق کی زیر صدارت وزارتی کمیٹی کا اجلاس ہوا۔

سید امین الحق نے اس موقع پر کہا کہ ویب سائٹ بندش کا مطلب ڈیجیٹل دنیا سے رابطہ منقطع اور سماجی ومعاشی نقصان کرنا ہے، ہم ایسے کسی بھی اقدام کے مخالف ہیں جس سے ملک کی تعمیر و ترقی کا عمل مفلوج ہوتا ہو۔

ان کا کہنا تھا کہ عوام میں شعور بیدار کیا جائے کہ وہ غیر اخلاقی اور مذہبی منافرت پر مشتمل ویب سائٹس کا وزٹ نہ کریں۔

وزیر قانون اعظم نذیر تارڑ نے اس موقع پر کہا کہ پی ٹی اے حکام کسی جانب سے ملنے والی ہدایات پر وزارت قانون و انصاف سے تجویز طلب کر سکتے ہیں، قانون میں ایسی ترامیم کی ضرورت ہے جس سے ویب سائٹ کی مکمل بندش کوئی نہ کر سکے۔

وفاقی وزیر تجارت سید نوید قمر نے کہا کہ وزیراعظم کی ہدایت پروکی پیڈیا کو کھولنے اور مستقبل میں ایسے اقدامات کی روک تھام کی تائید کرتے ہیں۔

اجلاس میں وزیر قانون و انصاف سینیٹر اعظم نذیر تارڑ، وفاقی وزیر تجارت سید نوید قمر، سیکریٹری آئی ٹی محسن مشتاق، ممبر لیگل، ممبر ٹیلی کام اور پی ٹی اے حکام نے شرکت کی۔