پی ٹی آئی رہنما یاسمین راشد نے کہا ہے کہ نواز زرداری دجالی ٹولا ملک کے لیے زہر قاتل بن چکا ہے۔

تفصیلات کے مطابق رانا ثناء اللہ کی پریس کانفرنس پر پی ٹی آئی رہنما یاسمین راشد نے ردعمل دیتے ہوئے کہا کہ رانا ثناءاللہ نے اپنی پریس کانفرنس میں گھٹیا ترین گفتگو کی، رانا ثناء اللہ کو شرم آنی چاہیئے۔

انہوں نے کہا کہ رانا ثناءاللہ جرائم پیشہ ٹولے کے سرغنہ ہے، قاتل راناثنااللہ نمبر ون بدتمیز اور سیاسی شیطان ہے۔

ان کا کہنا تھا کہ ملک کو ڈیفالٹ اور مہنگائی کے سمندر میں دھکیلنے والا نواز زرداری دجالی ٹولا ملک کے لیے زہر قاتل بن چکا ہے۔

ان کا کہنا تھا کہ انتخابات میں عوام نواز شریف کے حواریوں کو ایسا پھینٹا لگائیں گے جو ان کی آنے والی نسلوں کو بھی یاد رہے گا۔

 یاسمین راشد نے کہا کہ شہباز سرکار اور ان کے حواری انتخابات نہ کروا کر آئین توڑنا چاہتے ہیں۔

انہوں نے کہا کہ نواز شریف فسادی اور بربادی ٹولہ ملک میں افراتفری پھیلانا چاہتا ہے۔

پی ٹی آئی رہنما یاسمین راشد نے مزید کہا کہ الیکشن سے بھاگنے والے جلد عوامی کٹہرے میں کھڑے ہوں گے۔

  دوسری جانب پی ٹی آئی رہنما عندلیب عباس نے بھی رانا ثناء اللہ کی پریس کانفرنس پر ردعمل دیتے ہوئے کہا کہ رانا ثناء اللہ کی گھٹیا گفتگو پر عوام دھیان نہیں دیتے، رانا ثناءاللہ کی بازاری گفتگو کی شدید الفاظ میں مذمت کرتے ہیں۔

انہوں نے کہا کہ رانا ثناءاللہ ڈٹھائی اور بے شرمی سے صبح و شام قوم سے جھوٹ بولتے ہیں۔

  ان کا کہنا تھا کہ نواز شریف اپنے پالتو رانا ثناء اللہ کو پٹہ ڈال کر رکھیں، نواز شریف اور ان کے حواری عمران خان سے سیاسی خوفزدہ ہیں، نواز شریف دجالی ٹولہ جلد اپنے منطقی انجام کو پہنچ جائے گا۔

پی ٹی آئی رہنما عندلیب عباس نے مزید کہا کہ سپریم کورٹ کا پنجاب اور کے پی کے اسمبلی کے انتخابات کے حوالے سے ازخود نوٹس لینا خوش آئند عمل ہے۔