چیف سیکرٹری پنجاب زاہد اختر زمان نے یوریا کھاد کی ذخیرہ اندوزی میں ملوث افراد کیخلاف سخت کارروائی کا حکم دے دیا ہے۔

تفصیلات کے مطابق چیف سیکرٹری پنجاب کی زیر صدارت ڈپٹی کمشنرز کا ویڈیو لنک اجلاس ہوا جس میں انہوں نے ڈپٹی کمشنرز کو گورننس، سروس ڈلیوری بہتر بنانے کی ہدایت کی۔

چیف سیکرٹری نے اجلاس کے دوران کہا کہ انتظامی افسران خود فیلڈ میں نکل کر صورتحال کا جائزہ لیں۔ گورننس، سروس ڈلیوری میں واضح بہتری نظر آنی چاہیے۔

چیف سیکرٹری نے پرائس کنٹرول کے حوالے سے بہتر کارکردگی کا مظاہرہ نہ کرنے والے اضلاع کو وارننگ جاری کر دی۔

ان کا کہنا تھا کہ ڈپٹی کمشنرز منڈیوں کا دورہ کر کے نیلامی کے عمل کی نگرانی کریں، یوریا کھاد کی مقررہ نرخوں پر وافر دستیابی یقینی بنائی جائے۔

انہوں نے مزید کہا کہ تعلیمی اداروں، ہسپتالوں، مراکز صحت میں ضروری سہولیات کی فراہمی یقینی بنائی جائے۔

چیف سیکرٹری نے اس موقع پر شہروں میں صفائی کے انتظامات بہتر بنانے، وال چاکنگ کے خاتمے سے متعلق بھی ہدایات جاری کیں۔