پاکستان تحریک انصاف (پی ٹی آئی) کا “جیل بھرو تحریک” کے حوالے سے اہم فیصلہ سامنے آگیا ہے۔

پارٹی ذرائع کا کہنا ہے کہ جیل بھرو تحریک میں  پارٹی ٹکٹ پر الیکشن میں حصہ لینے والے امیدوار گرفتاریاں نہیں دیں گے۔

ذرائع نے بتایا تحریک انصاف نے فیصلہ کیا ہے کہ  امیدوار اپنی انتخابی مہم پر توجہ دیں گے۔

ذرائع کا مزید کہنا ہے کہ انتخابات میں حصہ لینے والے پارٹی امیدواروں کو فیصلے سے بھی آگاہ کر دیا گیا ہے، بروقت ضرورت جیل بھرو تحریک میں مرکزی اور صوبائی رہنماؤں سمیت کارکنان گرفتاریاں دیں گے۔

خیال رہے کہ گزشتہ ہفتے سابق وزیراعظم اور چیئرمین پی ٹی آئی عمران خان کی جانب سے جیل بھرو تحریک کا اعلان کیا گیا تھا۔

اعلان کے موقع پر ان کا کہنا تھا کہ حکومت نے مجھےجیل میں ڈالنے کا پلان بنایا ہوا ہے، ان کا منصوبہ تحریک انصاف کو کمزور کرنا ہے، ورکرز اور قوم جیل بھرو تحریک کی تیاری کریں  اور سب انتظار کریں میں کال دوں گا اور ہم پاکستان کے جیلوں کو بھر دیں گے تاکہ ان کا شوق پورا ہو جائے۔

جیل بھرو تحریک میں خود گرفتاری دونگا، عمران خان

گزشتہ روز سابق وزیراعظم اور چیئرمین تحریک انصاف عمران خان نے بول نیوز سمیت دیگر صحافیوں سےگفتگو کرتے ہوئے کہا تھا کہ مکمل صحتیاب ہونےکیلئے2 ہفتے لگیں گے، صحیت یاب ہونے کے بعد جیل بھرو تحریک کو لیڈ کرونگا اور جیل بھرو تحریک میں خود گرفتاری دونگا۔

عمران خان کا کہنا تھا کہ یہ میرے ہاتھ پیر باندھ کر الیکشن میں جانا چاہتے ہیں جبکہ آئینی طور پر الیکشن 90 روز میں ہوتے ہیں، اس پر عملدر آمد متعلقہ اداروں نے کروانا ہے۔

اس سے قبل چیئرمین پاکستان تحریک انصاف عمران خان نے  ‘جیل بھرو تحریک ‘ کے حوالے سے اہم ترین ویڈیو پیغام جاری کیا جس میں ان کا کہنا تھا کہ انتخابات 90 دن سے آگے گئے تو جیل بھرو تحریک کا آغاز کردوں گا۔

سابق وزیراعظم کا کہنا تھا کہ قوم کو سمجھانا چاہتا ہوں کہ ہم کیوں’ جیل بھرو تحریک ‘کا آغاز کرنا چاہتے ہیں، ساری دنیا میں قومیں  کسی قانون کے تحت چلتی ہیں آئین  فیصلہ کرتا ہے کہ کون سی چیز جائز ہے اور کون سی چیز  ناجائز ہے لیکن جب سے یہ امپورٹڈ حکومت آئی ہے اس ملک کے آئین  اور قانون  کی دھجیاں اڑائی گئی ہیں۔

یہ بھی پڑھیں: انتخابات 90 دن سے آگئے گئے تو جیل بھرو تحریک کا آغاز کردوں گا، عمران خان

عمران خان نے کہا کہ حالات یہ ہیں  کہ عدالتوں کے احکامات نہ پولیس سنتی ہے نہ یہ ریاست سنتی ہے، جب یہ امپورٹڈ حکومت اسلام آباد کے ضمنی انتخابات سے بھاگ رہی تھی تو عدالت نے کہا کہ 48 گھنٹوں میں  الیکشن کرواؤ تاہم تقریباً  مہینہ  گزر چکا ہے لیکن ابھی تک الیکشن نہیں کروائے گئے۔

انہوں نے مزید کہا تھا کہ ہم نے اپنی دو حکومتوں کی قربانی دی صرف اس لئے کہ آئین 90 روز میں الیکشن کا حکم دیتا ہے، تقریباً 25 روز گزر چکے ہیں لیکن ابھی تک الیکشن کی کوئی تاریخ نہیں دی گئی جو کہ آئین کی صریح خلاف ورزی ہے، اگر یہ 90 روز سے تجاوز کرتے ہیں تو آئین بالکل واضح ہے کہ ان پر آرٹیکل 6 لگے گا۔