ترجمان دفتر خارجہ ممتاز زہرا بلوچ نے کہا ہے کہ پاکستان کشمیریوں کی سیاسی، اخلاقی اور سفارتی مدد جاری رکھے گا۔

دفتر خارجہ کی ممتاز زہرا بلوچ نے صحافیوں کو ہفتہ وار میڈیا بریفنگ  دیتے ہوئے کہا کہ وزیر خارجہ بلاول بھٹو زرداری نے ہنگری کا دو روزہ دورہ کیا، اس دوران اہم ملاقاتیں کیں اور ایم او یوز پر دستخط ہوئے۔

انہوں نے بتایا کہ وزیر خارجہ نے ہنگری میں ہیڈ آف مشنز کی سالانہ کانفرنس سے خطاب بھی کیا، انہوں نے جرمنی اور لیتھوانیا کے دورے بھی کیے تاہم مینوخ کانفرنس کی سائڈ لائنز پر وزیر خارجہ نے اہم ملاقاتیں بھی کیں۔

ممتاز زہرا بلوچ نے میڈیا بریفنگ میں واضح کیا کہ گزشتہ روز وزیر دفاع نے افغانستان کا دورہ کیا، ان کے ہمراہ ایک اعلیٰ سطح کا وفد بھی تھا، وزیر دفاع اور ان کے وفد کی افغان عبوری حکومت کی قیادت سے ملاقاتیں کیں۔

ترجمان نے کہا کہ ملاقاتوں کے دوران خطے میں دہشت گردی کے بڑھتے خطرات پر گفتگو کی گئی، کالعدم ٹی ٹی پی اور داعش خراسان کے دہشت گردی خطرات پر بھی بات چیت ہوئی تاہم پاک امریکہ ملاقات تجارتی مذاکرات واشنگٹن میں جاری ہیں۔

ممتاز زہرہ بلوچ نے کہا کہ وزیر خزانہ آج تاشقند روانہ ہوں گے، پاکستان ازبکستان کے درمیان تجارت، ٹراسپورٹ، زراعت سمیت اہم امور پر بات ہو گی۔

انکا کہنا ہے کہ ترجمان دفتر خارجہ نے کہا ہے کہ بھارتی غیر قانونی مقبوضہ کشمیر میں بھارتی بربریت جاری ہے، پاکستان کشمیریوں کی سیاسی، اخلاقی اور سفارتی مدد جاری رکھے گا، بھارت مسلسل انسانی حقوق کی خلاف ورزیاں کر رہا ہے۔

صحافی ارشد شریف قتل کیس پر ترجمان دفتر خارجہ کا ردعمل

صحافی ارشد شریف قتل کیس پر ترجمان دفتر خارجہ نے ردعمل دیتے ہوئے کہا کہ وزیر اعظم شہباز شریف نے ارشد شریف قتل کیس کا معاملہ کینیا کے صدر کے ساتھ اٹھایا، وزیراعظم نے ابھی تک کیے جانے والے تعاون پر کینیا کا شکریہ ادا کیا۔

ترجمان دفتر خارجہ نے کہا کہ وزیراعظم نے کینیا سے مزید تعاون کی درخواست کی، کینیا کے صدر نے تحقیقات کے حوالے سے مکمل تعاون کا یقین دلایا ہے۔

طور خم بارڈر پاکستان کی طرف سے بند نہیں کیا گیا

ترجمان نے بتایا کہ طور خم بارڈر پاکستان کی طرف سے بند نہیں کیا گیا بلکہ افغانستان کی طرف سے بند کیا گیا ہے۔

ممتاز زہرہ بلوچ نے مزید کہا کہ افغانستان میں پاکستان کے ناظم الامور گزشتہ روز کابل جانے والے وفد میں شامل تھے،  ناظم الامور بھی پاکستان وفد کے ساتھ واپس آگئے ہیں۔