اسلام آباد: معروف قانون دان ڈاکٹر بابر اعوان نے کہا ہے کہ اقتدار سے نکلنے والے حکومتی وزراء ملک سے باہر چلے جائیں گے۔

تحریک انصاف کے رہنما ڈاکٹر بابر اعوان نے انسدادِ دہشت گردی عدالت کے باہر میڈیا سے گفتگو کرتے ہوئے کہا کہ رانا ثناء اللہ کا وارنٹ پنجاب میں نکلا اور آئی جی پنجاب کہتے ہیں کہ دیکھ لیں گے، پاکستان میں کبھی میر جعفروں کی کمی نہیں رہی۔

انہوں نے کہا کہ دونوں آئی جیز کا کورٹ مارشل ہونا چاہیے، دونوں آئی جیز کو کشمیر بھیج دیں فتح حاصل کر کے آئیں گے۔

ماہر قانون کا کہنا ہے کہ خیبر پختونخوا کے حوالے سے جو الفاظ کہے گئے ان کو واپس لینے چاہیے، کسی فرقے یا نسل کے بارے میں ریمارکس دیے جائیں تو دہشت گردی کا پرچہ ہوتا ہے ۔

پی ٹی آئی وکیل نے کہا کہ لاہور کو بند کر کے انسانی حقوق کی خلاف ورزی کی گئی۔ اقتدار سے نکلنے والے حکومتی وزراء ملک سے باہر چلے جائیں گے۔

بابر اعوان نے مزید کہا کہ عمران خان پر انیس دفعات اور پچاسی مقدمے ہیں، عمران خان کی پرائیویٹ شکائت پر وارنٹ نکلا ہوا ہے۔

چند روز قبل بابر اعوان نے اپنے بیان میں کہا تھا کہ یہ لوگ عمران خان سے خوفزدہ ہیں، آئی جی پنجاب اپنے آپ کو ڈاکٹر کہتے ہیں لیکن انسانیت کا زرہ بھی نہیں ان میں، حکمران الیکشن کرانے پر مجبور ہو جائیں گے ہر صورت الیکشن ہوں گے ۔

بابر اعوان نے کہا کہ اعلیٰ عدلیہ قانونی و آئین کی بالادستی قائم رکھے ہوئے ہیں، آئندہ سال فروری میں سینٹ کے الیکشن ہونے ہیں جس کے لیے پورے ملک کی نمائندگی ضروری ہے ۔

انہوں نے یہ بھی کہا تھا کہ تمام قومی ادارے بشمول الیکشن کمیشن کوئی بھی الیکشن نہیں روک سکتا جبکہ اب نواز شریف کے پلیٹ لیٹس بھی نہیں گر رہے لیکن وہ پھر بھی پاکستان واپس نہیں آئیں، انہیں ہم اور پاکستان کی عوام ہی واپس لائیں گے۔

بابر اعوان نے مزید تھا کہ یہ خود باہر نکلنے سے ڈرتے ہیں اور عمران خان کو روک لیتے ہیں، پنجاب اور کے پی کے کا الیکشن پی ٹی آئی کا ہے انشاء اللہ جیتیں گے۔