ملک میں مغربی ہوائیں داخل ہوگئی ہیں جس کے پیش نظر کراچی سمیت ملک کے بیشتر علاقوں میں آج بارش کا امکان ہے۔

محکمہ موسمیات کے مطابق کراچی شہر میں گرمی کی شدت میں اضافہ جاری ہے تاہم آج کم سے کم درجہ حرارت 23 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35 تا 37 ڈگری سینٹی گریڈ ریکارڈ ہونے کا امکان ہے۔

اس کے علاوہ شہر میں ہوا میں نمی کا تناسب 83 فیصد ریکارڈ کیا گیا جبکہ اس وقت 6 کلو میٹر فی گھنٹہ کی رفتار سے جنوب مغربی ہوا چل رہی ہے۔

محکمہ موسمیات نے بتایا کہ کراچی میں سمندری ہوائیں معطل ہوگئی ہیں تاہم آج شام بوندا باندی کا امکان ہے البتہ مطلع ابر آلود رہے گا۔

موسم کا حال بتانے والوں کے مطابق شہر میں 17  تا 19 مارچ گرج چمک کے ساتھ تیز بارش کا امکان ہے اور اس دوران گرد آلود ہوائیں یا آندھی بھی چل سکتی ہے۔

محکمہ موسمیات کے مطابق آج اسلام آباد میں موسم جزوی ابرآلود رہنے کے علاوہ شام اور رات میں آندھی، تیز ہواؤں اور گرج چمک کے ساتھ بارش کا امکان ہے۔

صوبہ خیبرپختونخوا کے بیشتر اضلاع میں مطلع جزوی ابرآلود رہنے کا امکان ہے تاہم سوات، دیر، چترال، ملاکنڈ، پشاور، ایبٹ آباد، مانسہرہ، ہری پور، کوہستان، کرم، وزیرستان، ڈی آئی خان اور بنوں میں آندھی، تیز ہواؤں اور گرج چمک کے ساتھ بارش کا بھی امکان ہے۔

یہ بھی پڑھیں: بارشیں ہی بارشیں؛ محکمہ موسمیات نے بڑی پیشگوئی کردی

اس کے علاوہ صوبہ پنجاب کے بیشتر اضلاع میں مطلع جزوی ابرآلود رہے گا تاہم خطہ پوٹھوہار، ڈی جی خان، بہاولپور، بہاولنگر، ساہیوال، ملتان، مری اور گلیات میں آندھی،تیز ہواؤں اور گرج چمک کے ساتھ بارش کا امکان ہے۔

صوبہ بلوچستان کے بیشتر اضلاع میں بھی مطلع جزوی ابرآلود رہنے کے امکان ہے جبکہ کوئٹہ، ژوب، چمن، زیارت، خضدار، قلات، نوشکی، لسبیلا، بارکھان، سبی اور نصیر آباد میں آندھی، تیز ہواؤں اور گرج چمک کے ساتھ بارش کا بھی امکان ہے۔

واضح رہے کہ ملک میں بارشوں کی پیشگوئی کے پیش نظر محکمہ موسمیات نے تمام متعلقہ اداروں کو الرٹ رہنے کی ہدایت کر رکھی ہے۔

یہ بھی پڑھیں: سندھ بھر میں کل سے شدید گرمی کا امکان