وزیر قانون اعظم نذیر تارڑ  نے کہا ہے کہ معاملہ ہائیکورٹ میں ہو تو سپریم کورٹ سوموٹو نہیں لے سکتی ہے۔

تفصیلات کے مطابق سپریم کورٹ کے باہر اٹارنی جنرل شہزاد عطا الٰہی کے ہمراہ میڈیا سے گفتگو کرتے ہوئے وزیر قانون اعظم نذیر تارڑ  نے کہا ہے کہ آج جو آئینی اور قانونی بات ہے وہی ہونی چاہیئے۔

انہوں نے کہا کہ فیصلہ جب بہت واضح ہو اور اس میں کوئی الہام نہ ہو تو فیصلے پر نظرثانی اپیل دائر کرنے کی ضرورت نہیں ہوتی ہے۔

انہوں نے مزید کہا کہ معاملہ جب ہائیکورٹ میں ہوتوسپریم کورٹ سوموٹو نہیں لے سکتی اور اس معاملے پر 2 ہائیکورٹس میں درخواستیں زیرسماعت ہیں اور ہائیکورٹس میں معاملےکی تشریح ہوسکتی ہے۔

یہ بھی پڑھیں: سپریم کورٹ کا کے پی اور پنجاب میں 90 دن میں انتخابات کروانے کا حکم

اعظم نذیر تارڑ نے کہا کہ ہمارا مؤقف ہے درخواست 3 کے مقابلے میں 4 ججز نے مستردکی جس کے مطابق 4 ججز نے پٹیشن کو مسترد کیا، 3 نے قابل سماعت قراردیا اور 2 ججز نے رضا کارانہ طور پر خود کو بنچ سے الگ کیا تھا۔

اٹارنی جنرل :

میڈیا سے گفتگو کرتے ہوئے اٹارنی جنرل کا کہنا تھا کہ انتخابات کے معاملے پر عدالتی کارروائی ہوئی اور ہم نے  ہر طرح سے تعاون بھی کیا اور کسی وکیل نے کوئی تاریخ نہیں مانگی ۔

انہوں نے کہا کہ کیس کی شروعات 9 رکنی پنچ سے ہوئی تھی اور کچھی معاملات کے بعد جب 5 ممبر بنچ بنا تو اس بنچ میں موجود دو ججوں نے 23 فروری کو ہی اپنے نوٹ میں اس پیٹیشن کو خارج کردیا تھا ۔

انہوں نے مزید کہا کہ آج کو فیصلہ آیا ہے جو کہ 3 ججوں کا فیصلہ ہے  اور  2 ججوں ایک فیصلے پر دستخط کئے لیکن غور کرنے والی بات یہ ہے کہ جو تحریری فیصلہ آیا ہے اس میں جسٹس منصور علی شاہ اور جسٹس جمال خان مندوخیل نے جسٹس اطہر من الله اور جسٹس یحییٰ خان آفریدی کے 23 فروری کے فیصلے سے اتفاق کیا ہے۔

اٹارنی جنرل نے بتایا کہ تحریری فیصلے میں 5 نہیں 7 ججوں کے فیصلے موجود ہیں جس میں سے 2 نے ان پیٹیشنز کو خارج کیا تھا اور آج بھی 2 ججوں اس پیٹیشن کو خارج کیا ہے، جس کا مطلب ہے کہ  4 معزز جج صاحبان نے اس پیشن کو خارج کردیا ہے۔

ان کا کہنا تھا یہ صورتحال ہے اور اب آگے اس پر جو بھی کارروائی ہوتی ہے۔