وفاقی وزیر خزانہ اسحاق ڈار نے کہا ہے کہ آئی ایم ایف سے معاملات جلد طے پا جائیں گے۔

تفصیلات کے مطابق اسلام آباد چیمبر کی طرف سے غیر ملکی سفرا کے اعزاز میں افطار ڈنر ہوا جس میں وزیر خزانہ اسحاق ڈار سمیت غیر ملکی سفرا نے شرکت کی۔

اس موقع پر وفاقی وزیر خزانہ اسحاق ڈار نے خطاب کرتے ہوئے کہا کہ آئی ایم ایف سے معاملات جلد طے پا جائیں گے، معاہدے سے مشکلات پر قابو پانے میں مدد ملے گی، پاکستان دیوالیہ نہیں ہوگا۔

   وفاقی وزیر خزانہ اسحاق ڈار نے مزید کہا کہ اس وقت ہماری معیشت کو سنگین معاشی چیلنجز کا سامنا ہے جبکہ  حکومت معیشت کو پائیدار ترقی کی راہ پر ڈالنے کیلئے ہر ممکن کوشش کر رہی ہے۔

  اس موقع پر صدر اسلام آباد چیمبر احسن ظفر بختاوری نے خطاب کرتے ہوئے کہا کہ کاروبار اور سرمایہ کاری کے فروغ کیلئے اقتصادی پالیسیوں کا تسلسل ضروری ہے، تاجر برادری معیشت بحالی کی کوششوں میں حکومت کا ساتھ دے گی اور حکومت پاکستان کو قرضوں سے نجات دلانے کیلئے اقدامات کرے۔

طارق فضل چوہدری نے کہا کہ حکومت کاروبار کرنے میں آسانیاں پیدا کرنے کے لیے پرعزم ہے۔