معروف قانون دان بیرسٹر اعتزاز احسن نے کہا ہے کہ ایک سیاسی کارکن کو سرعام قتل کردینے پر معطل ہونا ناکافی ہے، سب کو گرفتار ہونا چاہیے۔

بیرسٹر اعتزاز احسن نے لاہور میں میڈیا سے گفتگو کرتے ہوئے کہا کہ پولیس نے ایک بچے کو شہید کردیا، جو پولیس والے اس کو ڈنڈے مارتے نظر آرہے ہیں ویڈیو میں انہیں فوراً گرفتار ہونا چاہیے۔

انہوں نے کہا کہ الیکشن شیڈول آنے کے بعد دفعہ 144 ختم ہوگئی، الیکشن شیڈول آئین کے تحت آیا، دفعہ 144 تو قانون کے تحت ہے، وہ تو ختم ہوگیا۔

معروف قانون دان کا کہنا ہے کہ علی بلال کی شہادت کیمروں کے سامنے ہوئی ہے، کیمروں میں ثبوت موجود ہے کس نے کون کون سے ضرب لگائی ہے، سب کو گرفتار ہونا چاہیے۔

اعتزاز احسن نے مزید کہا کہ ایک سیاسی کارکن کو سرعام قتل کردینے پر معطل ہونا ناکافی ہے، بہت ظلم ہے۔

واضح رہے کہ زمان پارک میں پی ٹی آئی ریلی کے دوران ورکر کی مبینہ ہلاکت کے معاملے پر پنجاب پولیس نے 2 رکنی انکوائری کمیٹی تشکیل دے دی۔

 انکوائری کمیٹی میں دو پولیس افسران واقعے کی تحقیقات کریں گے، جن میں ڈی آئی جی ایلیٹ فورس صادق علی اور ایس ایس پی عمران کشور شامل ہیں۔

انکوائری ٹیم گواہوں کے بیان لے گی، واقعے کی سی سی وی فوٹیج اور ویڈیو کلپ پر مشتمل رپورٹ 3 دن میں آئی جی پنجاب کو پیش کرے گی۔

 گزشتہ روز لاہور پولیس کی جانب سے شدید شیلنگ اور تشدد کے باعث پاکستان تحریک انصاف کا کارکن علی بلال عرف ضل شاہ شہید ہوگیا تھا۔

پی ٹی آئی کارکن علی بلال محمدی پارک، جہانگیر ٹاؤن لاہور کا رہائشی تھا اور کل پی ٹی آئی کی ریلی میں شریک تھا۔

پی ٹی آئی کارکنوں کے ساتھ پولیس کے تصادم میں کارکن کے سر پر ڈنڈے مارے گئے جس سے وہ زخمی ہوگیا اور اسپتال میں دم توڑ گیا۔

بعدزاں نگران وزیر اعلیٰ پنجاب محسن رضا نقوی نے ہنگامہ آرائی میں مبینہ طور پر ہلاکت کا سخت نوٹس لیتے ہوئے فوری تحقیقات کا حکم دے دیا۔