نگران وزیر اعلیٰ خیبر پختونخوا محمد اعظم خان نے کہا ہے کہ صحت کارڈ اسکیم عوامی فلاح و بہبود کیلئے موثر پروگرام ہے۔

تفصیلات کے مطابق نگران وزیر اعلیٰ خیبر پختونخوا محمد اعظم خان کی زیر صدارت صحت کارڈ اسکیم سے متعلق اجلاس ہوا جس میں وزیر اعلیٰ کو صحت کارڈ اسکیم سے متعلق مختلف امور پر بریفنگ دی گئی۔

اجلاس میں بریفنگ دیتے ہوئے کہا گیا کہ صحت کارڈ اسکیم کے تحت 97 لاکھ خاندان علاج معالجے کی مفت سہولیات سے مستفید ہو رہے ہیں، صحت کارڈ اسکیم پر سالانہ 28 ارب روپے لاگت آرہی ہے، اس مقصد کے لئے نجی و سرکاری سطح پر 1139 ہسپتالوں کو پینل میں شامل کیا گیا ہے۔

اجلاس میں شعبہ صحت کے ماہرین پر مشتمل ایک کمیٹی تشکیل دینے کا فیصلہ ہوا جو صحت کارڈ اسکیم کے امور کو مزید بہتر بنانے اور موجودہ خامیوں کو دور کرنے کی تجاویز دے گی۔

اجلاس میں مشیر وزیر اعلیٰ برائے صحت، سیکرٹری خزانہ، پی ڈی صحت کارڈ اسکیم اور دیگر حکام نے شرکت کی۔