پاکستان پیپلز پارٹی (پی پی پی) کے 2 اہم رہنما ای سی ایل سے نام نکلنے پر بیرون ملک روانہ ہوگئے۔

ایئرپورٹ کے ذرائع نے بتایا کہ وزیراطلاعات سندھ شرجیل انعام میمن ایگزٹ کنٹرول لسٹ (ای سی ایل) سے نام نکلنے کے بعد پہلی بار بیرون ملک روانہ ہوگئے۔

ذرائع کے مطابق وزیراطلات شرجیل میمن امارات ایئرلائن کی پرواز EK-603 کے ذریعے کراچی ایئرپورٹ سے دبئی روانہ ہوئے۔

ذرائع کا کہنا تھا کہ شرجیل میمن کو عدالت سے اجازت ملنے کے بعد ای سی ایل سے نام نکالا گیا، شرجیل میمن محکمہ اطلاعات میں مبینہ کرپشن ریفرنس کے باعث 2017 سے بیرون ملک نہیں گئے۔

ذرائع نے بتایا کہ 6 سال بعد شرجیل میمن کا نام ای سی ایل سے نکالنے کے بعد پہلی بار بیرون ملک روانہ ہوئے ہیں۔

دوسری جانب صوبائی وزیر شرجیل انعام میمن کے بعد پیپلز پارٹی کے اہم رہنما سابق مشیر پیٹرولیم ڈاکٹر عاصم حسین بھی بیرون ملک روانہ ہوگئے۔

ذرائع نے مزید بتایا کہ ڈاکٹر عاصم حسین غیرملکی ایئرلائن کی  پرواز سے لندن روانہ ہوئے تاہم ڈاکٹر عاصم چند روز بیرون ملک قیام کے بعد وطن واپس پہنچیں گے۔