وزیر اعظم شہباز شریف نے کہا ہے کہ پاکستان اپنا کھویا ہوا مقام ضرور حاصل کرے گا۔

تفصیلات کے مطابق وزیر اعظم شہباز شریف نے راولپنڈی میں مفت آٹا فراہمی مرکز کا دورہ کیا اور آٹا مرکز آنے والے افراد سے ملاقات کی۔

وزیر اعظم نے آٹا فراہمی مرکز کے دورے کے موقع پر میڈیا سے گفتگو کرتے ہوئے کہا کہ حکومت کم آمدنی والوں کو سہولت فراہم کررہی ہے، جن کو اب تک 1 تھیلانہ ملا کل سے انہیں یکمشت 3 ملیں گے۔

شہباز شریف نے کہا کہ غریب کو مفت آٹا فراہم کیا جارہا ہے، ملک کی تاریخ میں مفت آٹے کا منصوبہ پہلی بار شروع کیا گیا، مفت آٹے فراہمی ایک چیلنچ ہے۔

وزیر اعظم نے مزید کہا کہ ہم نے پاکستان کو مل کر بدلنا ہے، پاکستان اپنا کھویا ہوا مقام ضرور حاصل کرے گا۔

واضح رہے کہ آٹا فراہمی میں بدنظمی کی شکایات پر وزیر اعظم شہباز شریف نے خود دوروں کا آغاز کیا ہے تاہم وزیراعظم نے اس سے قبل سرگودھا، لاہور، چنیوٹ اور قصور کے اچانک دورے کیے تھے۔

دو روز قبل لاہور میں ایک اجلاس کی صدارت کرتے ہوئے وزیراعظم محمد شہباز شریف نے متعلقہ حکام کو ہدایت کی کہ ہر مستحق شخص کو مفت آٹے کی فراہمی کو یقینی بنایا جائے۔

وزیر اعظم نے کہا تھا کہ حکومت رمضان المبارک کے دوران معاشرے کے غریب طبقے کی مشکلات کو کم کرنے کے لئے ہر ممکن اقدام کر رہی ہے۔

انہوں نے حکام کو ہدایت کی کہ وہ ان اہل افراد کی فوری رجسٹریشن کو یقینی بنائیں جنہیں بے نظیر انکم سپورٹ پروگرام میں رجسٹریشن نہ ہونے کی وجہ سے مفت آٹا نہیں مل رہا ہے۔

وزیر اعظم نے مزید ہدایت کی کہ مفت آٹا تقسیم کرنے والے مقامات پر فوری طور پر نادرا اور بی آئی ایس پی کے کاؤنٹرز قائم کیے جائیں۔