مرکزی رویت ہلال کمیٹی پاکستان کا اجلاس آج پشاور میں ہو گا۔

 تفصیلات کے مطابق پشاور میں آج شام مرکزی رویت ہلال کمیٹی کا اجلاس اوقاف ہال میں ہوگا جس کی صدارت مولانا سید عبد الخبیر آزاد کریں گے اس اجلاس میں ماہ رمضان کے چاند کی رویت کا فیصلہ اور اعلان کیا جائےگا۔

 ذرائع نے بتایا ہے کہ اس اجلاس میں مركزی و زونل ممبران ، وزارت مذہبی امورودیگر اداروں کے نمائندے شریک ہوں گے۔

 جبکہ غیر سرکاری رویت ہلال کمیٹی کا ایک اور اجلاس آج مسجد قاسم علی خان میں ہوگا اور اس غیر سرکاری کمیٹی اجلاس کی صدارت مفتی شہاب الدین پوپلزئی کریں گے۔

پشاورسمیت دیگر شہروں میں  بھی چاند نظر آنے کے امکانات روشن ہیں، محکمہ موسمیات

 محکمہ موسمیات کے مطابق  پشاور میں آج مطلع جزوی طور پرابر آلود رہے گا تاہم اسکے باوجود چاند نظر آنے کا قوی امکان موجود ہے۔

 محکمہ موسمیات کا کہنا ہےکہ غروبِ آفتاب کے بعد 49 منٹ تک چاند کو دیکھا جا سکےگا اور چاند کی عمر20 گھنٹہ 31 منٹ ہوگی۔

پشاورکے علاوہ دیگر شہروں میں بھی رمضان المبارک کا چاند نظر آنے کے امکانات  روشن ہیں۔