متحدہ قومی موومنٹ (ایم کیو ایم) پاکستان کے سینئر رہنما ڈاکٹر فاروق ستار نے کہا ہے کہ جب کراچی میں حلقہ بندیاں ہی درست نہیں تھی تو پھر کس طرح کراچی میں انتخابات ہوسکتے ہیں، ایم کیو ایم پاکستان یہ مطالبہ کرتی ہے کہ کراچی میں بلدیاتی انتخابات پھر سے ہونا چاہیے۔

 ایم کیو ایم سینئر ڈپٹی کنونئیر فاروق ستار نے کراچی میں پریس کانفرنس کرتے ہوئے کہا کہ میرے سامنے دو موضوع ہیں جو بہت اہم ہیں۔ جن انتخابات کی حلقہ بندیاں غلط ہوں وہ انتخابات کیسے ہو سکتے ہیں، ہم نے کہا تھا کہ بلدیاتی حلقہ بندیوں میں کراچی کی 73 یوسیز کم کر دی گئی ہیں، اب ایسے انتخابات میں کیسے حصہ لیا جائے۔

انکا کہنا ہے کہ ایک اتنی بڑی دھاندلی پکڑی گئی جس کا صوبائی حکومت نے اعتراف کیا، یہ انتخابات مائنس 53 یوسیز کے بغیر ہوئے، آج یہ ثابت ہوا ہمارا مطالبہ جائز تھا۔

ایم کیو ایم کے رہنما نے کہا کہ الیکشن سے دو روز قبل وزیراعلیٰ سندھ نے ہمارے موقف کی تائید کی، ہمیں یقین دہانی کروائی گئی تھی کہ الیکشن نہیں ہونے دیں گے۔ ہماری بات درست ہوئی کہ ابھی نئی مردم شماری نہیں ہوئی تو نئی حلقہ بندیاں نہیں ہو سکتیں۔

انہوں نے کہا کہ 53 یوسیز کا اضافہ پرانی حلقہ بندیوں کو درست کیا گیا، کاش ان یوسیز کا اضافہ 13 جنوری کو ہو جاتا اور صوبائی حکومت پہلے نوٹس لے لیتی، اگر یہ پہلے ہو جاتا تو شاید ہم بھی بلدیاتی انتخابات کا حصہ بن جاتے۔

فاروق ستار نے کہا کہ  جب کراچی میں حلقہ بندیاں ہی درست نہیں تھی تو پھر کس طرح کراچی میں انتخابات ہوسکتے ہیں، ایم کیو ایم پاکستان یہ مطالبہ کرتی ہے کہ کراچی میں بلدیاتی انتخابات پھر سے ہونا چاہیے۔

یہ بھی پڑھیں: اگر کراچی کو اپنا حق لینا ہے تو مردم شماری میں خود کو گنوانا ہے، فاروق ستار

انکا کہنا ہے کہ اللہ تعالیٰ نے ہمیں سرخرو کیا اور ہم حکومت سندھ سے 53 سیٹس واپس لینے میں کامیاب ہوئے، جن جماعتوں کے پاس شہر کا 15 فیصد بھی مینڈیٹ نہیں اس جماعت کا مئیر کیسے آسکتا ہے۔

فاروق ستار نے مزید کہا کہ  جو شمار کنندہ گھروں پر آرہے ہیں وہ دو سال کے بچے سے اسکا آئی ڈی کارڈ طلب کررہے ہیں اور اس سے پوچھا جارہا ہے کہ وہ شادی شدہ ہے یا غیر شادی شدہ ہے یہ کس طرح کا فارم ترتیب دیا گیا ہے۔