وزیرِ اعظم شہباز شریف نے کہا ہے کہ حکومت انضمام شدہ فاٹا اضلاع کی ترجیحی بنیادوں پر ترقی کیلئے پر عزم ہے۔

تفصیلات کے مطابق وزیرِ اعظم شہباز شریف سے انضمام شدہ فاٹا اضلاع کے ارکانِ قومی اسمبلی کے پانچ رکنی وفد نے ملاقات کی۔

وفد نے وزیرِ اعظم کو متعلقہ حلقوں کے مسائل اور جاری ترقیاتی منصوبوں کے بارے آگاہ کیا۔

وزیرِ اعظم نے اس دوران انضمام شدہ فاٹا اضلاع کیلئے فوری طور پر ترقیاتی فنڈز جاری کرنے کی ہدایت کرتے ہوئے کہا کہ متعلقہ اسکیموں کیلئے فنڈز کی منظوری ای سی سی اور دیگر فورمز سے جلد کروائی جائے، حکومت انضمام شدہ فاٹا اضلاع کی ترجیحی بنیادوں پر ترقی کیلئے پرعزم ہے۔

شہباز شریف نے کہا کہ حکومت ملک بھر کے معاشی طور پر کمزور علاقوں کی ترقی کیلئے اقدامات کر رہی ہے۔

ملاقات میں وفاقی وزراء عبدالشکور، ساجد طوری کے علاوہ ارکانِ قومی اسمبلی مولانا جمال الدین، علی وزیر، محسن داوڑ نے شرکت کی۔

وفاقی وزراء اسحاق ڈار اور سردار ایاز صادق بھی اس موقع پر موجود تھے۔

ضرور پڑھیں؛ آئین کا سنگین مذاق اڑایا جارہا ہے، ایوان کو نوٹس لینا ہوگا، وزیراعظم