مسلم لیگ ن کا اہم مشاورتی اجلاس ہوا جس میں سیاسی اور معاشی معاملات سمیت دیگر ایشوز پر بات چیت کی گئی۔

تفصیلات کے مطابق مسلم لیگ ن کا اہم مشاورتی اجلاس شہباز شریف کی رہائشگاہ ماڈل ٹائون میں ہوا۔

 اجلاس کی صدارت وزیراعظم شہباز شریف نے کی جبکہ پارٹی قائد نوازشریف سے بھی ویڈیو لنک کے ذریعے طویل مشاورت کی گئی۔

ماڈل ٹاؤن لاہور میں منعقدہ مشاورتی اجلاس میں مریم نواز، حمزہ شہباز، مصدق ملک، ملک احمد خان، مریم اورنگزیب، خواجہ سعد رفیق، سردار ایاز صادق سمیت مختلف وفاقی وزرا، معاونین نے بھی خصوصی شرکت کی۔

اس موقع پر وزیراعظم شہباز شریف نے اجلاس کے شرکاء کو مولانا فضل الرحمان اور آصف علی زرداری سے ملاقاتوں کے بارے بھی آگاہ کیا۔

ذرائع کے مطابق ماڈل ٹاؤن میں ہونے والی ملاقات میں سیاسی صورتحال، معاشی معاملات، عوامی ریلیف سمیت دیگر اہم ایشوز پر بات چیت ہوئی۔

اجلاس میں پی ٹی آئی کی جانب سے مذکرات کی پیشکش کو موضوع بحث لایا گیا۔

 عمران خان کی رہائش گاہ پر پولیس اہلکاروں پر حملے اور عدالت کے باہر ہونے والی غنڈہ گردی کی مذمت کی گئی جبکہ اجلاس میں عمران خان کی جانب سے حکومتی اداروں پر حملے کےلئے جامع حکمت عملی اور  پنجاب و خیبر پختونخواہ میں ہونے والے انتخابات اور انتخابی مہم ٹکٹوں کی تقسیم پر بھی مشاورت ہوئی۔

اس موقع پر مہنگائی کی صورتحال کو مدنظر رکھتے ہوئے عوام کو ریلیف دینے کےلئے مختلف آپشنز پر بریفنگ بھی دی گئی اور رمضان پیکج کے حوالے سے بھی آگاہ کیا گیا۔

پارٹی ذرائع کے مطابق وفاقی حکومت کا سستے پیٹرول کی فراہمی کے لئے موٹر سائیکل اور رکشہ ڈرائیورز کو پیٹرول کارڈ کی صورت میں ریلیف دینے پر غور بھی زیر بحث رہا۔