پارلیمنٹ کی پبلک اکاؤنٹس کمیٹی (پی اے سی) نے نادرا کی جانب سے شہریوں کا ڈیٹا لیک ہونے کا نوٹس لے لیا۔

تفصیلات کے مطابق پبلک اکاؤنٹس کمیٹی کا اجلاس چیئرمین نورعالم خان کی زیرصدارت ہوا جس میں پی اے سی نے نادرا کی جانب سے شہریوں کا ڈیٹا لیک ہونے کا نوٹس لیا۔

پبلک اکاؤنٹس کمیٹی نے وزارت داخلہ کو شہریوں کا ڈیٹا لیک ہونے کی مشترکہ تحقیقات کی ہدایت کردی۔

چیئرمین پی اے سی نور عالم خان نے کہا کہ پی ٹی اے، ایف آئی اے اور ملٹری انٹیلیجنس کو بھی تحقیقاتی ٹیم میں شامل کیا جائے۔

نور عالم خان نے پی ٹی اے کو ڈیٹا بلاک کرنے کی ہدایت کی اور کہا کہ ہر ایک کا ذاتی ڈیٹا انٹرنیٹ پر موجود ہے، نادرا سے کیسے لیک ہوا، عسکری حکام کا ڈیٹا بھی لیک ہوا ہے۔

اجلاس میں عدم شرکت پر پی اے سی کا اظہار برہمی

دوسری جانب پبلک اکاؤنٹس کمیٹی نے سیکریٹری مذہبی امور کی اجلاس میں عدم شرکت پر برہمی کا اظہار کیا اور سیکریٹری مذہبی امور کو پیر کے روز طلب کر لیا۔

حکام مذہبی امور نے کہا کہ سیکریٹری مذہبی امور کل سعودیہ سے واپس آئے ہیں، ان کی طبیعت ناساز ہے۔

نور عالم خان نے کہا کہ حاجیوں کا آپ نے کیا حال کر دیا ہے، کیا بیماری ہے سیکریٹری کو؟ کیا وہ وینٹیلیٹر پر ہیں۔

اجلاس میں پی اے سی نے پاکستانی حاجیوں کے ساتھ زیادتی اور بد انتظامی کی انکوائری کی ہدایت کی اور کہا کہ  پرائیویٹ حج آپریٹرز کے معاملات کی بھی چھان بین کی جائے۔

انہوں نے مزید کہا کہ متعدد حاجیوں نے مجھ سے براہ راست رابطہ کیا ہے، وہ غریب وزیر جو موٹر سائیکل پر پھرتا تھا اس کا دور ٹھیک تھا، مفتی عبدالشکور کے دور میں حاجیوں کو کوئی تکلیف نہیں تھی۔