پاکستان سے جدید جے ایف 17 تھنڈر سی بلاک تھری لڑاکا طیاروں کی خریداری کے معاملے پر پاکستان اور عراق کے مابین امور حتمی مرحلے میں داخل ہوگئے ہیں۔

اس حوالے سے ذرائع نے بتایا کہ عراق، پاکستان سے 12 جدید ترین جے ایف 17 تھنڈر سی بلاک تھری طیارے خریدے گا تاہم عراق نے پاکستان سے طیاروں کی خریداری کے لئے 66 کروڑ 40 لاکھ ڈالر کا بجٹ مختص کیا ہے۔

ذرائع کے مطابق جدید ترین لڑاکا طیارے جے ایف 17 تھنڈر سی بلاک تھری کی فی یونٹ قیمت 5 کروڑ 53 لاکھ ڈالر ہے۔ عراق کو طیاروں کی منتقلی سمیت تربیت، تکنیکی تعاون، پرزہ جات کی فراہمی بھی یقینی بنائی جائے گی۔

ذرائع کا کہنا ہے کہ جے ایف 17 تھنڈر سی بلاک تھری ماک 1.6 رفتار کے ساتھ چوتھی جنریشن پلس لڑاکا طیارہ ہے، جہاز 13 ہزار 500 کلوگرام وزن کے ساتھ اڑان بھرنے اور 55 ہزار 500 فٹ کی بلندی پر پرواز کرنے کا حامل ہے۔

ذرائع نے بتایا کہ جے ایف 17 تھنڈر بلاک تھری گلاس کاکپٹ، نیویگیشن، انجن، ہائیڈرالکس، فلائیٹ کنٹرول سمیت جدید ترین طیارہ ہے، یہ ہر قسم کے ماحول، موسم میں آپریشن کی صلاحیت، اہداف کی جانچ، پڑتال اور سمت کا تعین کر سکتا ہے۔

اس کے علاوہ جے ایف 17 تھنڈر سی بلاک تھری بیک وقت طویل، محدود اور آنکھ سے اوجھل کئی اہداف کو نشانہ بنانے کی خودکار صلاحیت کا حامل ہے، تاہم یہ ایک وقت میں 15 اہداف کی جانچ کرکے، 4 اہداف کو لاک اور نشانہ بنانے کی بھرپور صلاحیت رکھتا ہے۔

ذرائع کے مطابق کاربن فائبر ٹیکنالوجی کی وجہ سے طیارہ ہلکے وزن کا حامل، جدید الیکٹرانک وارفیئر نظام سے لیس ہے، جہاز کسی بھی پوزیشن سے میزائل فائرنگ اور میزائل ازخود سمت، رفتار اور شدت کا تعین کرکے اہداف تباہ کر سکتا ہے۔

ذرائع کا کہنا ہے کہ طیارہ 8 ہارڈ پوائنٹس، طویل، محدود فاصلے تک مار کرنے والے اور اینٹی ریڈی ایشن میزائلز رکھتا ہے اور یہ لیزر گائیڈڈ ہتھیاروں، رن وے پینی ٹریشن بموں اور 23 ملی میٹر ڈبل بیرل گن سے لیس ہے۔

ذرائع نے مزید بتایا کہ طیارہ فضاء سے فضاء، سمندر اور زمین پر اہداف کو پوری درستگی سے نشانہ بنانے کا حامل ہے، دشمن کے داغے میزائل کا ہنگامی انتباہ، جامع زاویہ رکھنے والا ہیڈ اپ اور جدید ہیلمٹ ماؤنٹڈ ڈسپلے کا حامل ہے، ایسا فائر کنٹرول ریڈار، بہترین ٹیکنالوجی، ایوی آنکس اور الیکٹرانکس کے ساتھ جدید ترین لڑاکا طیارہ ہے