وزیراعظم شہباز شریف نے مادر ملت محترمہ فاطمہ جناح کو 56 ویں یوم وفات پر خراج عقیدت پیش کرتے ہوئے کہا کہ فاطمہ جناح قوم کے لئے ماں کا درجہ رکھتی ہیں، قوم پر ان کے بہت احسانات ہیں۔

شہباز شریف نے اپنے جاری کردہ بیان میں کہا کہ محترمہ فاطمہ جناح ایک عظیم بھائی کی عظیم بہن تھیں۔ فاطمہ جناح بابائے قوم کے لئے حوصلے اور ہمت کا ذریعہ تھیں۔

انہوں نے کہا کہ مادر ملت پیرانہ سالی کے باوجود آمریت کے خلاف ڈٹ کر کھڑی ہوئیں، عوام، جمہوریت اور ملک کے لئے تاریخی کردار ادا کیا۔

وزیراعظم کا کہنا تھا کہ محترمہ فاطمہ جناح نے تحریک پاکستان اور ملک کیلئے بے مثال کردار ادا کیا اور قربانیاں دیں۔ ان کی شخصیت آج کی بچیوں اور خواتین کے لئے مشعل راہ ہے۔

شہباز شریف نے کہا کہ قوم مادر ملت کی پاکستان کے لئے خدمات کو خراج عقیدت پیش کرتی ہے اور ہمیشہ ان کے احسانات کی مقروض رہے گی۔

وزیراعظم نے قوم سے مادر ملت کے لئے دعا کی اپیل کی اور کہا کہ اللہ تعالیٰ ان کے درجات بلند فرمائے۔

واضح رہے کہ مادر ملت محترمہ فاطمہ جناح کی 56 ویں برسی آج ملک بھر میں انتہائی عقیدت و احترام کے ساتھ منائی جارہی ہے۔

1919 میں یونیورسٹی آف کلکتہ سے محترمہ فاطمہ جناح نے ڈینٹل سرجن کی ڈگری حاصل کی جس کے بعد انہوں نے محمد علی جناح کے ساتھ قیام پاکستان کی جدوجہد میں نمایاں کردار ادا کیا۔

انہوں نے اپنے بھائی محمد علی جناح کے ساتھ شانہ بشانہ کام کیا اور برصغیر کی خواتین کو ایک پلیٹ فارم پر جمع کیا جس سے مسلمانوں کی علیحدہ ریاست کے حصول کی جدوجہد آسان ہو گئی۔

مادر ملت محترم فاطمہ جناح کو تحریک آزادی میں ان کے کردار کی وجہ سے ’مادر ملت‘ اور ’خاتون پاکستان‘ کہا جاتا ہے۔

محترمہ فاطمہ جناح 31 جولائی 1893 کو کراچی میں پیدا ہوئیں اور آج ہی کے دن 1967 میں انتقال کر گئیں۔

فاطمہ جناح کو عوامی حقوق کے لئے ان کی پرجوش حمایت اور تحریک پاکستان میں وقف جدوجہد کے لئے آج بھی یاد کیا جاتا ہے۔