مسلم لیگ ن کی عام انتخابات میں حکمت عملی سے متعلق  پارٹی میں سینیر رہنماؤں کے درمیان مشاورت جاری ہے۔

ن لیگ کے ذرائع نے بتایا کہ عام انتخابات میں ٹکٹ کے لیے پہلی ترجیح ن لیگ کے وفادار اراکین ہونگے، ان اراکین میں الیکٹ ایبل زیادہ شامل ہیں۔

ذرائع کے مطابق تحریک انصاف کا مقابلہ کرنے والے تجربہ کار اور نوجوان اراکین کو بھی ٹکٹس ملیں گے۔

ذرائع کا کہنا ہے کہ استحکام پاکستان پارٹی، جے یو آئی ف اور پیپلز پارٹی سے سیٹ ایڈجسٹمنٹ کا فیصلہ نواز شریف کرینگے، کسی بھی جماعت کو ابھی تک مخصوص تعداد میں نشستوں کی پیش کش نہیں کی گئی، کسی بھی سیاسی جماعت سے انتخابی اتحاد نہیں ہوگا۔

اس کے علاوہ مولانا فضل الرحمان سے سیٹ ایڈجسٹمنٹ کے لیے مذاکرات مریم نواز کی وطن واپسی پر ہونگے جبکہ مریم نواز وطن واپسی پر سندھ میں پیر پگاڑا سے بھی ملاقات کرینگی۔

ذرائع ن لیگ نے مزید بتایا کہ سندھ میں پیپلز پارٹی کا مقابلہ کرنے کے لیے ن لیگ، جی ڈی اے سے سیٹ ایڈجسٹمنٹ پر مشاورت کررہی ہے۔