نگران صوبائی وزیر صحت ڈاکٹر جاوید اکرم نے کہا ہے کہ پنجاب میں صحت کارڈ بلا تعطل جاری رہے گا۔

تفصیلات کے مطابق نگران صوبائی وزیر صحت ڈاکٹر جاوید اکرم کی زیر صدارت صحت سہولت پروگرام کے حوالہ سے اہم بیٹھک ہوئی جس میں پاکستان سوسائٹی آف انٹروینشنل کارڈیالوجی، نیشنل انٹروینشنل کارڈیالوجی بورڈ اور پاکستان سوسائٹی آف انٹرنل میڈیسن کے نمائندگان نے بھی شرکت کی۔

 اس موقع پر نگران صوبائی وزیر صحت ڈاکٹر جاوید اکرم نے شرکاء کے ساتھ صحت سہولت پروگرام کے حوالہ سے انٹروینشنل کارڈیالوجی پروسیجرز کے ریگولیٹری معاملات پر تبادلہ خیال کیا گیا۔

نگران صوبائی وزیر صحت ڈاکٹر جاوید اکرم نے اظہار خیال کرتے ہوئے کہا کہ صحت سہولت پروگرام کے ذریعے دل کے امراض میں مبتلا مریضوں کو صحت کی بہتر سہولیات فراہم کی جا رہی ہیں۔

انہوں نے کہا کہ پنجاب ہیلتھ کیئر کمیشن کو صحت کارڈ پر ہونے والے علاج کے معیار کو مانیٹر کرنے کی ہدایت کی گئی ہے، انہوں نے کہا کہ پنجاب میں صحت کارڈ بلا تعطل جاری رہے گا، صحت سہولت کارڈ کے غلط استعمال کو روکنے کیلئے ایک میکزم وضح ہونا چاہیئے۔

ان کا کہنا تھا کہ پاکستان سوسائٹی آف انٹروینشنل کارڈیالوجی اور نیشنل انٹروینشنل کارڈیالوجی بورڈ کے تجاویز کردہ آپریٹرز کو ہی انٹروینشنل کارڈیالوجی پروسیجرز کرنے کی اجازت ہوگی۔

ان کا یہ بھی کہنا تھا کہ پنجاب ہیلتھ کیئر کمیشن کو صحت کارڈ کے حوالہ سے بد عنوانی میں ملوث عناصر کے خلاف بلاامتیاز کارروائی کی ہدایت کی گئی ہے، پنجاب میں ان ستائیس کیتھ لیب سنٹرز کو شو کاز نوٹس دے کر فوری بند کرنے کا حکم دیا گیا ہے، نئی گائیڈ لائنز کے مطابق ہی دل کے امراض میں مبتلا مریضوں کو سٹنٹس ڈالنے کی ہدایت کی گئی ہے۔

 نگران صوبائی وزیر صحت ڈاکٹر جاوید اکرم نے مزید کہا ہے کہ پنجاب میں ستائیس کیتھ لیب سنٹرز پنجاب ہیلتھ کیئر کمیشن کے لائسنس کے بغیر ہی صحت سہولت کارڈ پر کارڈیک پروسیجرز کر رہے تھے۔