پاکستان رینجرز نے پاک بھارت بین الاقوامی سرحد کے قریب پاکستانی حدود سے 6 بھارتی شہریوں کو حراست میں لے لیا۔

پاک فوج کے شعبہ تعلقات عامہ (آئی ایس پی آر) کے مطابق بھارتی شہریوں کو 29 جولائی سے 3 اگست کے دوران حراست میں لیا گیا، یہ بھارتی اسمگلرز/ جرائم پیشہ افراد منشیات، ہتھیار اور ایمونیشن پاکستان اسمگل کرنے کی کوشش کر رہے تھے۔

آئی ایس پی آر کا کہنا ہے کہ گرفتار بھارتی شہریوں میں فیروزپور کے رہائشی گرمیج سنگھ، شندر سنگھ، جگندر سنگھ اور وشال سنگھ شامل ہیں۔

اس کے علاوہ جالندھر کا رہائشی مہندر سنگھ اور لدھیانہ سے تعلق رکھنے والا گروندر سنگھ بھی گرفتار بھارتی شہریوں موجود ہے۔

آئی ایس پی آر نے بتایا کہ گرفتار اسمگلروں کے خلاف پاکستان میں غیر قانونی داخلے اور ریاست مخالف سرگرمیوں پر پاکستانی قوانین کے مطابق کارروائی کی جائے گی۔

آئی ایس پی آر کے مطابق بھارتی اسمگلروں کی بی ایس ایف کے زیر نگرانی بارڈر سے بلا روک ٹوک نقل و حرکت حیران کن ہے، بھارتی بی ایس ایف کا اسمگلروں کے ساتھ ممکنہ گٹھ جوڑ بعید از قیاس نہیں۔

آئی ایس پی آر نے مزید کہا کہ توقع رکھتے ہیں کے بی ایس ایف بارڈر پر نگرانی کا نظام مؤثر اور اسمگلروں کے ساتھ گٹھ جوڑ ختم کرے گی۔

واضح رہے کہ انتخابات قریب آتے ہی مودی سرکار کے اوچھے ہتھکنڈے، سیز فائر خلاف ورزیوں اور دراندازی کوششوں میں اضافہ ہورہا ہے، گزشتہ روز بھارتی فوج نے 3 سال سے جاری سیز فائر معاہدے کی خلاف ورزی کرتے ہوئے نکیال سیکٹر میں بلا اشتعال فائرنگ سے 60 سالہ غیاث کو شہید کر دیا تھا۔

ہندوستان ماضی میں بھی پاکستان میں اسمگلنگ اور دہشتگردوں کی پشت پناہی میں ملوث رہا ہے۔

تجزیہ نگار کا کہنا ہے کہ سیز فائر معاہدے کی خلاف ورزی، اسمگلنگ اور دراندازی میں اضافہ مودی سرکار کی طرف سے جنگ کا ماحول بنا کر 2024 کے انتخابات پر اثرانداز ہونے کی کوشش ہے۔ جعلی سرجیکل اسٹرائیک، پلوامہ ڈرامہ اور اڑی حملہ مودی کی طرف سے انتخابی اسٹنٹ تھے۔

دفاعی ماہرین کا کہنا ہے کہ جیسے جیسے انتخابات قریب آئیں گے، مودی سرکار کی طرف سے پاکستان مخالف کارروائیوں اور بیانیے میں شدت آئے گی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/08/164462/amp/ کو لائک کریں۔