عام انتخابات نئی مردم شماری کے مطابق کرانے کے معاملے پر ڈیجیٹل مردم شماری کے نتائج کو حتمی شکل دے دی گئی ہے۔

اس حوالے سے شماریات ڈویژن کے ذرائع نے بتایا کہ ڈیجیٹل مردم شماری کے نتائج کی منظوری مشترکہ مفادات کونسل سے لی جائے گی۔

ذرائع کا کہنا ہے کہ مشترکہ مفادات کونسل کے اجلاس میں نئی ڈیجیٹل مردم شماری کے نتائج پیش کیے جائیں گے۔

ذرائع شماریات ڈویژن کے مطابق نئی ڈیجیٹل مردم شماری کی منظوری کیلئے تمام صوبوں سے مشاورت کا آغاز کردیا گیا ہے۔

ترجمان شماریات ڈویژن نے تصدیق کی ہے کہ سی سی آئی کا اجلاس ہوا تو مردم شماری نتائج پیش کیے جائیں گے۔

واضح رہے کہ گزشتہ روز وزیر اعظم شہباز شریف کی جانب سے انتخابات نئی مردم شماری کے تحت کرانے کا اعلان کیا گیا تھا۔

وزیراعظم کا کہنا تھا کہ نئی مردم شماری کے تحت ہی انتخابات میں جانا ہے، مردم شماری ہوئی ہے تو اسی پر انتخابات ہونے چاہئیں، الیکشن کمیشن کی ذمےداری ہے وہ انتخابات کرائیں گے۔

انہوں نے مزید کہا تھا کہ مردم شماری کے نتائج مکمل ہونے پر مشترکہ مفادات کونسل میں جائیں گے۔ انتخابات میں تاخیر کا کوئی جواز نہیں ہے۔

دوسری جانب ‏ وزیر اعظم شہباز شریف کے نئی مردم شماری کے تحت الیکشن کرانے کے اعلان پر پاکستان پیپلز پارٹی (پی پی پی) نے ناراضگی کا اظہار کردیا ہے۔

پیپلز پارٹی کا کہنا ہے کہ ‏وزیراعظم شہباز شریف کے اس اعلان کا مقصد ہے نئی حلقہ بندیاں ہوں، نئی حلقہ بندیوں میں کم از کم چھ ماہ درکار ہوں گے۔ ہم کسی صورت الیکشن میں تاخیر نہیں چاہتے، ہم ہر صورت میں الیکشن وقت پر چاہتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/08/230175/amp/ کو لائک کریں