اسلام آباد: مردم شماری 2023 کے نتائج کی منظوری کیلئے مشترکہ مفادات کونسل (سی سی آئی) کا اجلاس کل طلب کرنے کا فیصلہ کرلیا گیا ہے۔

اس حوالے سے ذرائع نے بتایا کہ سی سی آئی اجلاس میں ڈیجیٹل مردم شماری کے نتائج اور رپورٹ کا جائزہ لیا جائے گا۔

ذرائع کے مطابق صوبائی حکومتیں ڈیجیٹل مردم شماری کے نتائج پر موقف پیش کریں گی۔

ذرائع نے مزید بتایا کہ سی سی آئی اجلاس میں ڈیجیٹل مردم شماری کی رپورٹ کی منظوری کا بھی امکان ہے۔

واضح رہے کہ چند روز قبل وزیر اعظم شہباز شریف کی جانب سے انتخابات نئی مردم شماری کے تحت کرانے کا اعلان کیا گیا تھا۔

وزیراعظم کا کہنا تھا کہ نئی مردم شماری کے تحت ہی انتخابات میں جانا ہے، مردم شماری ہوئی ہے تو اسی پر انتخابات ہونے چاہئیں، الیکشن کمیشن کی ذمےداری ہے وہ انتخابات کرائیں گے۔

انہوں نے مزید کہا تھا کہ مردم شماری کے نتائج مکمل ہونے پر مشترکہ مفادات کونسل میں جائیں گے۔ انتخابات میں تاخیر کا کوئی جواز نہیں ہے۔

دوسری جانب ‏وزیر اعظم شہباز شریف کے نئی مردم شماری کے تحت الیکشن کرانے کے اعلان پر پاکستان پیپلز پارٹی (پی پی پی) نے ناراضگی کا اظہار کیا تھا۔

پیپلز پارٹی کا کہنا تھا کہ ‏وزیراعظم شہباز شریف کے اس اعلان کا مقصد ہے نئی حلقہ بندیاں ہوں، نئی حلقہ بندیوں میں کم از کم چھ ماہ درکار ہوں گے۔ ہم کسی صورت الیکشن میں تاخیر نہیں چاہتے، ہم ہر صورت میں الیکشن وقت پر چاہتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/08/503923/amp/ کو لائک کریں