آئی جی سندھ غلام نبی میمن نے کہا ہے کہ مجرمان کی مانیٹرنگ کے ایکٹ 2023 پر عمل درآمد کو یقینی بنانا ہوگا۔

تفصیلات کے مطابق آئی جی سندھ غلام نبی میمن کی زیر صدارت اعلیٰ سطحی کا اجلاس ہوا جس میں عادی اسٹریٹ کریمنلز/مجرمان کی ای ٹیگنگ اور مانیٹرنگ ایکٹ  سے متعلق اقدامات کا جائزہ لیا گیا۔

آئی جی سندھ غلام نبی میمن نے مختلف افسران کی سربراہی میں دو کمیٹیاں تشکیل دے دیں، ایک کمیٹی کا سربراہ ایڈیشنل آئی جی انویسٹی گیشن کو بنایا گیا ہے جبکہ دوسری کمیٹی ڈی آئی جی سی آئی اے کی سربراہی میں کام کرے گی اور کمیٹیاں ای ٹیگنگ اور بریسلیٹ ودیگرضروری امور کے تیکنیکی معاملات دیکھے گی، ای ٹیگنگ کے ذریعے  کالز/ایس ایم ایس اور مجرم کو مخصوص فاصلے تک محدود کیا جاسکے گا۔

اس موقع پر آئی جی سندھ غلام نبی میمن نے کہا کہ عادی مجرمان کی ای ٹیگنگ کی جائیگی، مجرمان کی مانیٹرنگ کے ایکٹ 2023 پر عمل درآمد کو یقینی بنانا ہوگا، عادی اسٹریٹ کریمنلز/مجرمان کی ای ٹیگنگ سے مختلف جرائم کی وارداتوں میں نمایاں کمی دیکھنے کو ملے گی، پندرہ جولائی کو عادی مجرمان کی ای ٹیگنگ کا بل سندھ اسمبلی سے منظور ہوا تھا۔