وزیراعظم شہباز شریف کے مشیر برائے آمور کشمیر و گلگت قمر زمان کائرہ نے کہا ہے کہ ہماری کوششوں سے مقبوضہ کشمیر کے عوام کی حوصلہ افزائی ہوئی ہے۔

تفصیلات کے مطابق وزیراعظم شہباز شریف کے مشیر برائے آمور کشمیر و گلگت قمر زمان کائرہ نے وزارت امور کشمیر و گلگت بلتستان کے ملازمین سے الوداعی ملاقات کی۔

ملاقات میں سیکرٹری امور کشمیر و گلگت بلتستان ظہور احمد، جوائنٹ سیکرٹری اے جے کے کونسل، جوائنٹ سیکرٹری جی بی کونسل کے علاوہ دیگر ملازمین نے شرکت کی۔

وزیراعظم شہباز شریف کے مشیر برائے آمور کشمیر و گلگت قمر زمان کائرہ نے کہا کہ وزارت کے امور کو احسن انداز میں سرانجام دینے کی بھرپور کوشش کی، وزارت کے تمام ذمہداروں نے دیے گئے اہداف کو مکمل کرنے کے لیے بھرپور محنت کی، وزارت امور کشمیر نے یوم یکجہتی کشمیر ، یوم استحصال اور یوم سیاہ کشمیر کو بھرپور انداز سے منایا، ہماری کوششوں سےمقبوضہ کشمیر کے عوام کی بھرپور حوصلہ افزائی ہوئی، تمام تر سیاسی وابستگیوں سے بالاتر ہو کر آزاد کشمیر اور گلگت بلتستان کے مسائل کے حل کے لیے خلوص نیت سے کوشش کی، تمام وفاقی اداروں میں آزاد کشمیر اور گلگت بلتستان کے معملات کے حوالے سے ہر ممکن معاونت کی۔

اس موقع پر پارلیمانی سیکرٹری امور کشمیر نے کہا کہ زمیداریاں پوری کرنے میں وزارت کے حکام کا بھرپور تعاون میسر رہا اور مشیر آمور کشمیر کی رہنمائی وزارت کی کارکردگی بہتر بنانے میں بڑی سود مند ثابت ہوئی۔

 سیکرٹری امور کشمیر اور دیگر اعلیٰ حکام نے مشیر امور کشمیر و گلگت بلتستان کو خراج تحسین پیش کیا۔

وزارت ملازمین نے مشیر امور کشمیر و گلگت بلتستان قمر زمان کائرہ کے لیے نیک خواہشات کا اظہار کیا۔

الوداعی ملاقات کے آخر میں مشیر آمور کشمیر کو وزارت کی جانب سے اعزازی شیلڈ پیش کی گئیں۔