اسلام آباد: ترجمان دفتر خارجہ ممتاز زہرا بلوچ نے کہا ہے کہ پاکستان نے برکس گروپ آف نیشنز میں شمولیت کی کوئی باضابطہ درخواست نہیں کی۔

دفتر خارجہ کی ترجمان ممتاز زہرا بلوچ نے صحافیوں کو ہفتہ وار بریفنگ دیتے ہوئے کہا کہ ہم نے برکس کی جوہانسپرگ میں سرگرمیاں دیکھی ہیں، برکس کو عالمی امن و یکجہتی کے لئے کام کرنا چاہیے۔

انہوں نے کہا کہ ابھی تک پاکستان نے برکس میں شمولیت کی خواہش کا اظہار نہیں کیا، تاہم برکس ایک اہم کثیر الحہتی فورم ہے۔

ترجمان نے بتایا کہ امریکی سفیر کی الیکشن کمشنر سے ملاقات ہوئی ہے جس کی تصدیق کی ہے، اس کی تفصیل امریکی سفارتخانے یا الیکشن کمیشن ہی دے سکتے ہیں۔

ممتاز زہرا بلوچ نے کہا کہ پاکستان رینجرز نے بھارت کی سرحد کے پاس چھ بھارتی اسمگلرز پکڑے ہیں، یہ اسمگلرز ہتھیار پاکستانی علاقے میں اسمگل کرنے کی کوششیں کر رہے تھے۔

دفتر خارجہ کی ترجمان نے کہا کہ پاکستان کا چین پر موقف مسلسل اور اصولی ہے، ہم ون چائنا پالیسی پر عمل پیرا ہیں۔

انکا کہنا ہے کہ مقبوضہ کشمیر میں حریت راہنماوں کو آزاد کیا جانا چاہیے، آزاد کشمیر میں پکڑے جانے والے مشکوک افغان باشندوں کے بارے میں آزاد کشمیر کا ہوم ڈیپارٹمنٹ جواب دے سکتا ہے۔

ترجمان دفتر خارجہ نے بتایا کہ اقوام متحدہ جنرل اسمبلی کے اجلاس میں شرکت کے حوالے سے وقت آنے پر آگاہ کریں گے۔

انہوں نے کہا کہ ایل او سی پر اشتعال انگیزی اور بلا اشتوال فائرنگ کے واقعات پر بھارت سے تحفظات کا اظہار کیا ہے۔ پاک بھارت ناظم الامور کا تبادلہ ایک معمول کی سرگرمی ہے،  ہمارے ناظم الامور کی مدت مکمل ہو چکی ہے جس پر ایک نئے افسر کو تعینات کیا جا رہا ہے۔

ممتاز زہرا بلوچ نے کہا کہ حال ہی میں پاکستان اور بھارت میں اسائنمنٹ ویزوں کا تبادلہ ہوا، اسائنمنٹ ویزوں کا تبادلہ ایک معمول کا عمل ہے، ویزا ملنے پر وہ اپنی نئی ذمہ داری کے لیے بھارت روانہ ہو جائیں گے۔

انکا کہنا ہے کہ ہم نے افغانستان سے جنم لینے والے دہشت گردی کے واقعات کو اٹھایا ہے، افغان حکومت سے تحفظات کا اظہار کیا ہے، افغان انتظامیہ نے یقین دہانی کرائی ہے کہ وہ اپنی سرزمین پاکستان کے خلاف استعمال نہیں ہونے دیں گے۔

دفتر خارجہ کی ترجمان نے مزید کہا کہ جڑاوالہ واقعات میں ریاست اور میڈیا دونوں متاثرین کے ساتھ کھڑے ہوئے، بطور ریاست پاکستان ایس کارروائیوں کی اجازت نہیں دے سکتا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/08/903488/amp/ کو لائک کریں۔