اسلام آباد: ترجمان دفتر خارجہ ممتاز زہرا بلوچ نے کہا ہے کہ سعودی ولی عہد کے دورہ پاکستان پر ابھی کوئی تبصرہ نہیں کرسکتے، پاکستان کی جانب سے ابھی تک اس دورے کا کوئی اعلان نہیں کیا گیا۔

دفتر خارجہ کی ترجمان ممتاز زہرا بلوچ نے صحافیوں کو ہفتہ وار بریفنگ دیتے ہوئے کہا کہ آج سید علی گیلانی کی دوسری برسی ہے، ان کی عظیم قربانی اور پاکستان سےغیرمشروط محبت پرہم انہیں سلام پیش کرتے ہیں، ہم بھارتی حکومت سے مطالبہ کرتے ہیں کہ وہ ان کی قبرتک اہل خانہ کو رسائی دے۔

انہوں نے کہا کہ نگران وزیراعظم انوارالحق کاکڑ کینیا کا دورہ کرینگے، وزیرخارجہ جلیل عباس جیلانی بھی ان کےہمراہ ہونگے، نیروبی میں وزیراعظم ماحولیاتی تبدیلیوں کے حوالے سے تقریبات میں شرکت کرینگے۔

ممتاز زہرا بلوچ نے کہا کہ جموں و کشمیر عالمی سطح پرتسلیم شدہ متنازعہ علاقہ ہے، اقوام متحدہ سلامتی کونسل یا قراردادوں سے ہٹ کر کوئی بھی اقدام ناقابل قبول ہے، پاکستان کی پوزیشن بڑی حد تک واضح ہے۔

دفتر خارجہ کی ترجمان نے کہا کہ مسئلہ کشمیر کا حل کشمیری امنگوں اور اقوام متحدہ سلامتی کونسل قراردادوں کے مطابق قابل قبول ہو گا، ہندوستان ہر صورت 5 اگست 2019ء کے غیرقانونی غاصبانہ اقدامات واپس لے، یہ ہندوستان کی ذمہ داری ہے کہ وہ مذاکرات کے لیے موذوں ماحول بنائے۔

ترجمان نے بتایا کہ سعودی ولی عہد کے دورہ پاکستان پر ابھی کوئی تبصرہ نہیں کرسکتے، پاکستان کی جانب سے ابھی تک اس دورے کا کوئی اعلان نہیں کیا گیا۔ پاکستان جی 20 کا رکن نہیں، تمام نکات کا جائزہ لے رہے ہیں، تاحال اس پر بات کرنا مناسب نہیں۔

انکا کہنا ہے کہ ہندوستان بارہا مقبوضہ جموں و کشمیر میں “حالات اچھے ہیں” کا راگ الاپتا رہتا ہے، ہندوستان کی دنیا سے حقائق کو چھپانے، غلط فہمیاں پیدا کرنے سے زمینی حقائق نہیں بدل سکتے، یوکرائن کو اسلحہ کی فراہمی کی رپورٹس میں کوئی صداقت نہیں۔

ممتاز زہرا بلوچ نے کہا کہ پاکستان، روس اور یوکرائن تنازعہ میں مکمل طور پر غیرجانبدار ہے، روس اور یوکرائن تنازعہ کے پرامن اور بذریعہ مذاکرات حل کا حامی ہے۔

دفتر خارجہ کی ترجمان نے کہا کہ یورپین یونین، کونسل کے مقبوضہ جموں و کشمیر میں انسانی حقوق کی صورتحال پر خدشات درست ہیں، یورپین یونین اور یورپین کونسل کا بھارت سے معاملہ اٹھانے کا فیصلہ خوش آئند ہے، فیصلے نے ثابت کیا بھارت کے مقبوضہ خطے میں حالات معمول پر ہونے کے دعوے کو قبول کرنے کو کوئی تیار نہیں۔

انکا کہنا ہے کہ بھارت کے ایک اسکول میں استاد نے ہندو بچوں کو مسلمان بچے کے چہرے پر تھپڑ رسید کرنے پر ابھارا، ہندوستان میں اقلیتوں خصوصاً مسلمانوں کے خلاف نفرت انگیز تشدد کو ہر سطح پر ہوا دی جا رہی ہے، بھارت سمیت دنیا میں مسلمانوں کے خلاف اسلاموفوبیا تیزی سے تشویشناک صورتحال اختیار کر رہا ہے۔

ترجمان دفتر خارجہ نے مزید کہا کہ بھارت کی پاکستان میں دہشتگردی کی پشت پناہی پر شدید تشویش ہے، پاکستان جڑانوالہ واقعے کی شدید مذمت کرتا ہے، پاکستان کی سیاست اور ثقافتی پیرائے می‍ں ایسے واقعات کی کوئی گنجائش نہیں، جڑانوالہ واقعے میں ملوث عناصر کو جلد کیفرکردار تک پہنچایا جائے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/09/197821/amp/ کو لائک کریں