نگران وزیر اعظم انوار الحق کاکڑ کی جانب سے حریت پسند رہنما سید علی گیلانی کی دوسری برسی پر خراج عقیدت پیش کیا گیا ہے۔

سماجی رابطے کی ویب سائٹ ٹوئٹر (ایکس) پر اپنے جاری کردہ بیان نگران وزیر اعظم نے کہا ہے کہ ممتاز کشمیری رہنما سید علی شاہ گیلانی کو ان کی دوسری برسی پر میرا سلام ہے۔

انوار الحق کاکڑ نے کہا کہ ظلم و ستم اور مشکلات کے باوجود کشمیر کاز سے علی شاہ گیلانی کی وابستگی بے مثال تھی۔

نگران وزیر اعظم نے مزید کہا کہ میں آزادی اور انصاف کے لیے ان کی زندگی بھر کی جدوجہد کو خراج عقیدت پیش کرتا ہوں۔

واضح رہے کہ آج شیر کشمیر سید علی شاہ گیلانی کی دوسری برسی عقیدت و احترام سے منائی جا رہی ہے۔ کشمیری حریت  رہنما سید علی شاہ گیلانی کی برسی کے موقع پر مقبوضہ وادی میں شٹر ڈاؤن ہڑتال ہے۔

سید علی گیلانی 1929 میں تحصیل بانڈی پورہ کے گاؤں زڑی منج میں پیدا ہوئے، انہوں نے مسجد وزیر خان سے ملحقہ مدرسے اور اورینٹل کالج لاہور سے تعلیم حاصل کی۔ اخبار خدمت میں رپورٹر اور پتھر مسجد سرینگر اور انٹرمیڈیٹ کالج سوپور میں استاد کے منصب پر فائز رہے۔

یکم ستمبر 2021 کو حیدرپورہ سرینگر میں خالق حقیقی سے جا ملے۔ وفات کی خبر ملنے پر خوفزدہ مودی سرکار نے وادی بھر میں کرفیو لگا کر  انٹرنیٹ اور ذرائع ابلاغ معطل کر دیے۔ سید علی گیلانی کا جسد خاکی پاکستانی پرچم میں لپیٹ کر لحد میں اتارا گیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/09/344010/amp/ کو لائک کریں