کراچی میں اسٹریٹ کرمنلز بے لگام ہوگئے ہیں، شہریوں کا صبر بھی جواب دے گیا ہے، عوام نے بہادری سے ڈاکوؤں کا مقابلہ شروع کردیا ہے۔

تفصیلات کے مطابق گلستان جوہر موسمیات موبائل مارکیٹ کے قریب ڈکیتی کی واردات ہوئی جہاں ملزمان نے مزاحمت پر شہری کو گولی مار کر زخمی کر دیا جبکہ واردات دیکھنے والے رکشہ ڈرائیور نے ڈاکوؤں کی موٹر سائیکل کو ٹکر مار دی جس کے باعث دونوں ڈاکو مشتعل عوام کے ہتھے چڑھ گئے، عوام نے ڈاکوؤں پر تشدد شروع کردیا اور ملزمان کی موٹر سائیکل کو عوام نے آگ لگا دی۔

پولیس نے بڑی جدوجہد کے بعد ملزمان کو عوام کے چنگل سے چھڑا کر تحویل میں لے لیا ہے۔

پولیس کا کہنا ہے کہ زخمی شہری کو قریبی اسپتال میں منتقل کردیا گیا ہے جبکہ زخمی ڈاکوؤں کو بھی جناح اسپتال منتقل کردیا گیا ہے۔