بجلی کے بلوں میں اضافے کیخلاف کراچی میں آج شٹر ڈاؤن ہڑتال ہوگی۔

تفصیلات کے مطابق کراچی میں آج بجلی کے اضافی بلوں کے خلاف تاجر سراپا احتجاج کریں گے، ایم اے جناح روڈ اور لائٹ ہاؤس مارکیٹ کی دکانیں بند رہیں گی۔

اس حوالے سے آل کراچی تاجرالائنس کے چیئرمین حکیم شاہ نے بتایا کہ آج تمام کاروباری مراکز بند رہیں گے، کراچی بجلی کے بِلز اور پیٹرولیم مصنوعات کی قیمتوں میں بے پناہ اضافہ فوری واپس لیا جائے۔

حکیم شاہ نے مزید کہا کہ مہنگائی نے ہماری کمر توڑ دی ہے، مطالبات نہ ماننے کی صورت میں تاجروں کی روزگار بچاؤ تحریک کو مزید تیز کریں گے۔

گزشتہ روز کراچی چیمبر آف کامرس نے مکمل ہڑتال کا اعلان کرتے ہوئے کہا تھا کہ کل کراچی بند رہے گا، کراچی چیمبر تاجروں کی ہڑتال کے ساتھ ہے، جمعے کو مکمل ہڑتال ہوگی۔

زبیر موتی والا نے چیمبر آف کامرس میں تاجروں کے اجلاس کے موقع پر میڈیا سے بات کرتے ہوئے کہا تھا کہ بجلی کا ٹیرف ہمیں قابل قبول نہیں ہے، چھوٹی صنعتیں ہوں یا بڑی اتنی مہنگی بجلی پر کاروبار ناممکن ہے۔

ان کا کہنا تھا کہ ہر کاروباری طبقہ بجلی کے زائد بلوں سے پریشان ہے، حکومت آئی پی پیز کے ساتھ بیٹھ کر بات کرے۔ پاور پروجیکٹس کے نرخوں پر نظر ثانی اشد ضرورت ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/09/897718/amp/ کو لائک کریں