پاکستان کے سفیر منیر اکرم نے کہا ہے کہ نگران وزیراعظم یو این جنرل اسمبلی کے 78 ویں اجلاس میں پاکستان کی نمائندگی کریں گے۔

سفیر منیر اکرم نے نگران وزیراعظم انوارالحق کاکڑ کے دورہ اقوام متحدہ کے حوالے سے نیویارک میں پریس بریفنگ دیتے ہوئے کہا کہ نگران وزیراعظم پاکستان بائیس ستمبر کو جنرل اسمبلی کے اجلاس سے خطاب کریں گے۔

پاکستانی سفیر نے بتایا کہ نگران وزیراعظم اپنے دورہ کے دوران سائیڈ لائن پر مختلف سربراہ مملکت اور عالمی مالیاتی اداروں کے سربراہان سے ملاقاتیں کریں گے۔

انہوں نے کہا کہ پاکستان میں موسمیاتی تبدیلیوں اور اس سے پیدا شدہ صورتحال نگران وزیر اعظم کے ایجنڈے میں سر فہرست رہے گا، موسمایاتی تبدیلیوں کے پاکستان میں اثرات سرخ لائن عبور کر چکے ہیں۔

منیر اکرم نے کہا کہ پاکستان میں گزشتہ سال سیلاب کی تباہ کاریوں کے حوالے سے جنیوا میں ڈونرز کانفرینس کے حوالے سے سیکریٹری جنرل سے نگران وزیراعظم خصوصی ملاقات کریں گے۔

انکا کہنا ہے کہ جنیوا ڈونرز کانفرینس میں چھ اعشاریہ دو ارب ڈالر کے مالی پیکج کا اعلان کیا گیا تھا، ڈونرز ممالک پراجیکٹس کی بنیاد پر رقوم فراہم کریں گے۔

پاکستانی سفیر نے کہا کہ پاکستان میں متعلقہ ادارے اس حوالے سے بحالی کے مختلف منصوبوں پہ ابتدائی کام مکمل کر چکے ہیں۔ نگران وزیراعظم اقوام متحدہ میں اپنی تقریر میں مسئلہ کشمیر، اسلامو فوبیا اور خطہ میں امن و امان سے ممبر ممالک کو آگاہی دیں گے۔

انہوں نے کہا کہ نگران وزیراعظم انوارالحق کاکڑ سے ورلڈ بینک اور آئی ایم ایف کی سربراہان کی ملاقاتیں بھی متوقع ہیں جبکہ نگران وزیراعظم امریکی صدر بائیڈن کے نیویارک میں خصوصی عشائیہ میں شریک ہوں گے۔

منیر اکرم نے مزید کہا کہ نگران وزیراعظم کے ہمراہ وزیر خارجہ پاکستان جلیل عباس جیلانی وزیر خزانہ شمشاد اختر اور وزیر صحت دورہ میں ہمراہ ہوں گے جبکہ انوارالحق کاکڑ کمرشل فلائٹ کے ذریعے پاکستان سے نیویارک پہنچیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/09/928332/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/09/928332/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں