نگران وزیر اطلاعات بلوچستان جان اچکزئی نے کہا ہے کہ پولیس فورس فارنرز ایکٹ کے تحت غیر قانونی غیر ملکیوں کو پکڑ کر فعال اقدامات کرنے کے لیے تیار ہے۔

غیر قانونی تارکین وطن کے اخراج سے متعلق نگران وزیر اطلاعات جان اچکزئی نے اپنے ٹوئٹر پر بتایا ہے کہ چیف سکریٹری بلوچستان نے افغان مہاجرین کے اخراج سے متعلق اہم اجلاس طلب کر لیا ہے جس میں افغان مہاجرین کی واپسی کے معاملات کے حل پر مختلف ایجنسیوں کے درمیان ہم آہنگی کو فروغ دیا جائے گا۔

پولیس فورس فارنرز ایکٹ کے تحت غیر قانونی غیر ملکیوں کو پکڑ کر فعال اقدامات کرنے کے لیے تیار ہے،جامع مہم شروع کرنے سے پہلے ابتدائی مرحلے کی نشاندہی کے اقدامات کئے جائیں گے جبکہ حکومت بلوچستان ایپکس کمیٹی کی طرف سے دی گئی تمام ہدایات پر تندہی سے عمل درآمد کے لیے پرعزم ہے۔

— Wahaj Suleman (@WahajSulem61621) October 6, 2023

انہوں نے کہا کہ پولیس فورس فارنرز ایکٹ کے تحت غیر قانونی غیر ملکیوں کو پکڑ کر فعال اقدامات کرنے کے لیے تیار ہے، اس اہم مسئلہ سے نمٹنے کے لیے ایک جامع مہم شروع کرنے سے پہلے ابتدائی مرحلے کی نشاندہی کے اقدامات کیے جائیں گے۔

جان اچکزئی نے کہا کہ حکومت بلوچستان ایپکس کمیٹی کی طرف سے دی گئی تمام ہدایات پر تندہی سے عمل درآمد کے لیے پرعزم ہے۔

نگران وزیر نے مزید کہا کہ ہمارے پاس دستاویزات کے بغیر رہنے والے تمام تارکین وطن کی رضاکارانہ وطن واپسی کے لیے 24 دن کا محدود وقت باقی ہے، تارکین وطن اس ڈیڈ لائن کو آخری موقع سمجھ کر ضروری طریقہ کار کی تعمیل اور ٹرانزیشن کے عمل پر تعاون کریں۔

جیلوں میں ایف آئی اے امیگریشن کاؤنٹر بنانے کا فیصلہ

افغان باشندوں کی واپسی کے معاملے پر ملک بھر کی 5 بڑی جیلوں میں ایف آئی اے امیگریشن کاؤنٹر بنانے کا فیصلہ کیا گیا ہے۔

ذرائع کے مطابق رہائش کا ثبوت نہ رکھنے والے غیرملکیوں کو جیل بھیجا جائے گا، امیگریشن حکام جیل سے ہی انہیں ڈی پورٹ کرنے کے اقدامات کریں گے۔

متعلقہ پولیس اور بارڈر ایریا پولیس غیر قانونی افغان باشندے کو سرحد پار کروا کے آئے گی، تمام گرفتار افغان باشندوں کو ہیومن رائٹس قوانین کے تحت سرحد پار بھیجا جائے گا۔

دوسری جانب اسلام آباد میں پولیس کا غیرقانونی مقیم غیر ملکیوں کے خلاف آپریشنز جاری ہے جس کے نتیجے میں 1126 افراد کو حراست لیا گیا جن میں سے 503 افراد کے پاس کسی قسم کے بھی کاغذات نہ نکلے۔

وفاقی پولیس نے 503 افراد کے خلاف فارن ایکٹ کے تحت مقدمہ درج کر لیا۔

یاد رہے کہ غیر قانونی طور پر پاکستان میں مقیم ان غیر ملکیوں میں بہت بڑی تعداد افغان باشندوں کی ہے جو پاکستان کے طول و عرض میں مقیم ہیں۔

اقوام متحدہ کے حالیہ اعداد و شمار کے مطابق پاکستان میں تقریباً 13 لاکھ افغان مہاجرین رجسٹرڈ ہیں اور مزید 8 لاکھ 80 ہزار کو قانونی حیثیت حاصل ہے، تاہم حکومت کا دعویٰ ہے کہ پاکستان میں 17 لاکھ افغان شہری غیر قانونی طور پر مقیم ہیں۔

غیر قانونی تارکین وطن کو دی گئی مہلت میں صرف 25 روز باقی رہ گئے ہیں، تاہم غیر قانونی طور پر مقیم غیرملکیوں کو 31 اکتوبر تک پاکستان چھوڑنا ہوگا، بصورت دیگر قانون نافذ کرنے والے ادارے گرفتاری اور ملک بدری کو یقینی بنائیں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/136875/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/10/136875/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں