ڈی جی رینجرز (سندھ) میجر جنرل اظہر وقاص نے اندرون سندھ کندھ کوٹ کا دورہ کیا۔

تفصیلات کے مطابق ڈی جی رینجرز (سندھ) نے اندرون سندھ کندھ کوٹ اور کچے کے علاقوں پولیس اسٹیشن گھوڑا گھاٹ، دُرانی مہر اور ملحقہ کچے کے علاقوں میں ڈاکوؤں کے خلاف جاری آپریشن کا جائزہ لیا۔

اس موقع پر علاقہ سیکٹر کمانڈر کی جانب سے ڈی جی رینجرز (سندھ) کو جاری آپریشن کے بارے میں تفصیلی بریفنگ دی، بعدازاں ڈی جی رینجرز (سندھ) نے کچے کے علاقے میں قائم ڈاکوؤں کی کمین گاہوں کا فضائی جائزہ لیا۔

ڈی جی رینجرز (سندھ) نے اس دوران شہریوں کے جان ومال اور قومی شاہراہ کو مکمل طور پر محفوظ بنانے کے لیے مزید چیک پوسٹوں کے قیام کی منظوری بھی دی۔

ڈی جی رینجرز(سندھ) نے دورے کے دوران جاری آپریشن پر اطمینان کا اظہار کیا اور ڈاکوؤں کی سہولتکاری میں ملوث افراد کی فہرستیں تیار کرنے اور ان کے خلاف قانونی کارروائی کرنے کی بھی ہدایات جاری کیں۔

اس موقع پرڈی آئی جی لاڑکانہ، ڈی آئی جی سکھر، پولیس اور رینجرز کے اعلیٰ افسران بھی موجود تھے۔

دوسری جانب نگران وزیراعلیٰ سندھ مقبول باقر نے شکارپور کے ایس ایچ او کوٹ شاہو سمیت 5 اہلکاروں کے اغوا پر شدید برہمی کا اظہار کیا ہے۔

یاد رہے کہ گزشتہ رات شکارپور کے کچے کے تھانے کوٹ شاہو پر ڈاکووں نے حملہ کر کے 6 پولیس اہلکار اغوا لیے۔