جمعیت علما اسلام (جے یو آئی) کے سربراہ مولانا فضل الرحمان نے کہا ہے کہ سیاسی انتشار سے جمہوریت مضبوط ہوگی نہ ملکی مسائل حل ہوں گے۔

تفصیلات کے مطابق مولانا فضل الرحمان نے اسلام آباد میں صحافیوں سے غیر رسمی گفتگو کرتے ہوئے کہا کہ تمام سیاسی جماعتیں ایک دوسرے کیلئے گنجائش پیدا کریں، سیاستدانوں میں اختلاف رائے کے باوجود گنجائش لازمی ہے اور وقت آگیا ہے کہ سیاستدان اور سیاسی جماعتیں بالغ نظری کا مظاہرہ کریں۔

انہوں نے کہا کہ سیاسی انتشار سے جمہوریت مضبوط ہوگی نہ ملکی مسائل حل ہوں گے جبکہ آپس میں گنجائش کا فائدہ کسی ایک جماعت کو نہیں بلکہ سب کو ہوگا، سیاستدان اختلاف رائے یا الگ مؤقف رکھ سکتا ہے لیکن انتشار نہیں پھیلانا چاہیے۔

ان کا کہنا تھا کہ پاکستان کے مسائل کا حل کسی ایک شخص یا جماعت کے پاس نہیں ہے، یہ بات قابل افسوس ہے کہ خود سیاستدانوں کے سبب ماضی اور حال میں جمہوریت کیلئے مشکلات آئیں لیکن اب سنبھلنا ہوگا، سیاسی منشور اور سیاسی مؤقف دینا سب کا حق ہے مگر اولین ترجیح پارلیمنٹ کی بالادستی ہے۔

مولانا فضل الرحمان کے مطابق اس وقت پاکستان اور امتِ مسلمہ دونوں کئی مشکلات کا شکار ہیں، معاشی ترقی و استحکام سیاسی و داخلی استحکام کے ساتھ جڑا ہوا ہے۔

انہوں نے کہا کہ آصف علی زرداری اور بھٹو خاندان کے ساتھ سیاسی اختلاف کے باوجود پرانے تعلقات ہیں اور ہم ایک دوسرے کی خوشی و غم میں شرکت بھی کرتے ہیں۔

ان کا مزید کہنا تھا کہ سیاسی جماعتوں کو اختلاف رائے کے باوجود سیاسی گنجائش پیدا کرنی چاہیے کیونکہ جمہوریت کی مضبوطی ضد اور ہٹ دھرمی میں نہیں بلکہ جمہوری رویوں کی مضبوطی میں ہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/pakistan/2023/10/617769/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/10/617769/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں