اسلام آباد: نگران وزیرِ اعظم انوار الحق کاکڑ نے کہا ہے کہ ہاکی ہمارا قومی کھیل ہے، اسے کھویا ہوا مقام واپس دلائیں گے۔

تفصیلات کے مطابق نگران وزیرِ اعظم انوار الحق کاکڑ سے ہاکی ایشیا کپ اور ورلڈ کپ جیتنے والے سابق کپتان پاکستان ہاکی ٹیم، اصلاح الدین صدیقی کی ملاقات ہوئی ہے۔

ملاقات میں اصلاح الدین صدیقی نے نگران وزیرِ اعظم کو اپنی سوانح عمری، ڈیش تھرو مائی لائف پیش کی اور گزشتہ شب ہاکی چیمپیئن شپ کے اختتامی میچ میں انوار الحق کاکڑ کی شرکت پر ان کا شکریہ ادا کیا۔

نگران وزیرِ اعظم اور اصلاح الدین صدیقی کے درمیان پاکستان میں ہاکی کی موجودہ صوتحال، اس کی بحالی اور فروغ کے اقدامات پر گفتگو ہوئی اور اصلاح الدین صدیقی نے کھلاڑیوں کی حوصلہ افزائی پر نگران وزیرِ اعظم کی خصوصی تعریف بھی کی۔

دوران ملاقات نگران وزیرِ اعظم نے گفتگو کرتے ہوئے کہا کہ پاکستانی ہاکی ٹیم نے کئی دہائیوں تک ہاکی کے میدانوں میں ملک و قوم کا نام روشن کیا، قومی کھیل ہاکی کی پاکستان میں موجودہ صورتحال تشویشناک ہے۔

انہوں نے مزید کہا کہ پاکستان میں ہاکی کو ایک مرتبہ پھر سے اسکا کھویا ہوا مقام دلوا کر رہیں گے، حکومت نوجوانوں میں ہاکی کے فروغ کیلئے ہر ممکن اقدامات کرے گی۔ اصلاح الدین صدیقی جیسے لیجنڈ پاکستان کے اصل ہیروز ہیں۔

نگران وزیرِ اعظم انوار الحق کاکڑ نے ہدایت دی کہ ہاکی کے کھلاڑیوں کو بین الاقوامی مقابلوں کی تیاری کیلئے ہر قسم کی سہولیات فراہم کی جائیں۔

نگران وزیراعظم سے سروسز لمیٹڈ کے چیف ایگزیکٹو آفیسر کی ملاقات

دوسری جانب نگران وزیراعظم انوار الحق کاکڑ سے معروف کاروباری شخصیت اور پاکستان سروسز لمیٹڈ کے چیف ایگزیکٹو آفیسر مرتضیٰ ہشوانی کی بھی ملاقات ہوئی جس میں ملک کی کاروباری استعداد کو مکمل طور پر بروئے کار لانے پر گفتگو کی گئی۔

ملاقات میں مرتضیٰ ہشوانی نے نگران وزیراعظم کو ملک میں معاشی استحکام لانے کی کامیاب کوششوں پر خراج تحسین پیش کیا اور خصوصی سرمایہ کاری سہولت کونسل  کے ذریعے ملک کی کاروباری کمیونٹی اور حکومت کے مابین کاروباری اشتراک کی تجویز بھی پیش کی۔

اس موقع پر نگران وزیراعظم نے کہا کہ خنجراب پاس سے لے کر سوات تک کے علاقے میں سیاحت کی لامحدود استعداد موجود ہے، پاکستانی کاروباری کمیونٹی اور چینی تعاون کے ذریعے خنجراب پاس سے لے کر سوات تک کے علاقے کے سیاحتی شعبے میں خاطر خواہ کام کیا جا سکتا ہے۔

ملاقات میں اچھے مقامات میں موجود سرکاری ملکیتی عمارتوں کو پبلک پرائیویٹ پارٹنرشپ کے ذریعے کاروباری سرگرمیوں کے لیے بروئے کار لانے پر بھی  گفتگو کی گئی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/646691/amp/ کو لائک کریں۔

ٹوئٹر پر ہمیں فالو کریں https://www.bolnews.com/urdu/pakistan/2023/10/646691/amp/ اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔