ایپکس کمیٹی کے اجلاس میں معیشت کو درپیش چیلینجز پر قابو پانے کی اہمیت پر زور دیا گیا ہے۔

تفصیلات کے مطابق نگران وزیرِ اعظم انوار الحق کاکڑ کی زیرِ صدارت خصوصی سرمایہ کاری سہولت کونسل کی ایپکس کمیٹی کا چھٹا اجلاس ہوا۔

جاری کردہ اعلامیے کے مطابق اجلاس میں چیف آف آرمی اسٹاف، نگران وفاقی کابینہ ارکان، چاروں صوبوں کے وزرائے اعلیٰ اور متعلقہ اعلیٰ حکام نے شرکت کی۔

 ایپکس کمیٹی نے ایس ایف آئی سی کے تحت ملک میں سرمایہ کاری کے فروغ کیلئے جاری مختلف اقدامات کا جائزہ لیا۔

اجلاس کو سرمایہ کاری کے فروغ اور کاروباری سہولیات کی فراہمی کیلئے اٹھائے گئے اقدامات پر تفصیلی بریفنگ دی گئی۔

سرمایہ کاری پر اثر انداز ہونے والے اقتصادی عناصر بشمول اصلاحاتی عمل میں تعطل اور شدید خسارے والے سرکاری اداروں کی نجکاری کے عمل کا بھی جائزہ لیا گیا۔

 ایپکس کمیٹی نے نجکاری کے عمل کو تیز کرنے پر اتفاق کیا، کمیٹی نے طے شدہ اہداف کے حصول کیلئے اٹھائے گئے اقدامات پر اطمینان کا اظہار  کیا جبکہ وزیرِ اعظم نے سرمایہ کاری کے فروغ اور معیشت کی بہتری کیلئے اقدامات کی پیش رفت پر اطمینان کا اظہار کیا۔

اجلاس میں نگراں وزیرِاعظم نے ہول آف دی گورنمنٹ اپروچ کے تحت معیشت کو درپیش چیلینجز پر قابو پانے کی اہمیت پر زور دیا۔

ایپکس کمیٹی کے اجلاس میں آرمی چیف نے معیشت کی بحالی و ترقی کیلئے پاک فوج کے حکومت کے ساتھ مکمل تعاون کے عزم کا اعادہ کیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/735189/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/10/735189/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں