اسلام آباد: اقتصادی رابطہ کمیٹی (ای سی سی) کے اجلاس میں ٹیلی کام انفرا اسٹرکچر فریم ورک کی منظوری کا امکان ہے۔

تفصیلات کے مطابق کابینہ کی اقتصادی رابطہ کمیٹی کا اجلاس آج ہوگا، جس کی صدارت نگران وزیر خزانہ ڈاکٹر شمشاد اختر کریں گی۔

اس حوالے سے ذرائع نے بتایا کہ اجلاس میں اقتصادی رابطہ کمیٹی 6 نکاتی ایجنڈے پر غور کرے گی جبکہ ملک میں مہنگائی کی صورتحال پر بھی بریفنگ دی جائے گی۔

ذرائع کے مطابق دوران اجلاس ربیع سیزن کیلئے یوریا کھاد کی ضرورت کے حوالے سے اقدامات کا جائزہ لیا جائے گا اور قومی کریڈٹ کمپنی کے قیام کے حوالے سے بھی کمیٹی اجلاس میں غور ہوگا۔

ذرائع کا مزید کہنا ہے کہ اقتصادی رابطہ کمیٹی کے اجلاس میں ٹیلی کام انفرا اسٹرکچر فریم ورک کی منظوری اور ماڑی گیس کے کنویں سے فرٹیلائزرز کیلئے گیس کی قیمت پر نظرثانی کا امکان ہے۔

یاد رہے کہ 19 ستمبر 2023 کو نگران وزیرخزانہ ڈاکٹر شمشاد اختر کی زیرصدارت اقتصادی رابطہ کمیٹی کے اجلاس میں سٹیل ملز کے ملازمین کیلئے رواں مالی سال کے چھ ماہ کی تنخواہیں دینے کا فیصلہ کیا گیا تھا اور تنخواہوں کی ادائیگی کیلئے رواں مالی سال کے بجٹ میں سے 10 ارب روپے کی منظوری دی گئی تھی۔

دوران اجلاس ای سی سی نے ملک میں مہنگائی کو کنٹرول کرنے کیلئے اقدامات کرنے، وزارت قومی تحفظ خوراک کو چینی اور گندم کی قیمتوں، اسٹاک کے بارے میں ریگولر رپورٹ پیش کرنے کی ہدایت اور وزارت منصوبہ بندی کو چیف سیکرٹریز کے ذریعے اشیاء ضروریہ پر غیر ضروری منافع کی روک تھام کی ہدایت بھی دی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/798717/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/10/798717/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں