ایف آئی اے امیگریشن کراچی نے بڑی کارروائی کر کے انتہائی مطلوب ملزم گرفتار کر لیا ہے۔

تفصیلات کے مطابق ایف آئی اے امیگریشن نے پنجاب پولیس کو انتہائی مطلوب ملزم کی کراچی ایئرپورٹ سے فرار ہونے کی کوشش کو ناکام بنا کر ملزم کو فوری طور پر حراست میں لے لیا۔

ملزم عبداللہ احمد کا نام انتہائی مطلوب افراد کی لسٹ میں شامل تھا جو عمرہ ادائیگی کے بہانے کراچی ائیرپورٹ سے فرار ہونا چاہتا تھا۔

امیگریشن کاونٹر پر پہنچتے ہی ملزم کی تفصیلات سامنے آگئیں جس کے بعد ایف آئی اے حکام نے پنجاب پولیس کو اطلاع دے دی۔

پنجاب پولیس  نے محکمہ داخلہ کے ذریعے ملزم کا نام انتہائی مطلوب افراد کی لسٹ میں شامل کرایا تھا تاکہ ملزم فرار نہ ہو سکے۔

ملزم ڈکیتی و دیگر سنگین وارداتوں میں ملوث ہے، وہ سعودی ایئر لائن کی پرواز سے سعودی عرب جانا چاہتا تھا

ایف آئی اے نے ملزم کو پنجاب پولیس کے حوالے کر دیا ہے۔

دوسری جانب گزشتہ روز ایف آئی اے سائبر کرائم سرکل پشاور نے پی ٹی اے حکام کے ساتھ کوہاٹ روڈ پشاور پر چھاپہ مار کر مشترکہ کارروائی کی۔

مشترکہ کارروائی کے دوران غیرقانونی سمز کے اجراء میں ملوث 2 ملزمان کو گرفتارکر لیا گیا۔ گرفتار ملزمان میں محمد زوہیب اور ذیشان احمد شامل ہیں۔

ایف آئی نے بتایا کہ ملزمان افغان پاسپورٹس پرغیر قانونی سمز جاری کرتے تھے، ملزمان سے ایکٹیویٹڈ سمز بھی برآمد کر لی گئی۔

آئی بی ایم ایس کے مطابق مذکورہ پاسپورٹس پر کسی قسم سفری ریکارڈ موجود نہ تھا، ملزمان کے واٹس ایپ پر مذکورہ پاسپورٹس اور ویزے کی تصاویر موصول ہوتی تھیں۔

ایف آئی اے کا کہنا تھا کہ ملزمان کو گرفتار کر کے تفتیش کا آغاز کر دیا گیا ہے۔