پاکستان اور کینیا کے درمیان مختلف شعبوں میں تعاون بڑھانے پر اتفاق ہوا ہے۔

تفصیلات کے مطابق نگران وزیرِ اعظم انوار الحق کاکڑ اور کینیا کے صدر ڈاکٹر ولیم روٹو کی بیجنگ میں تیسرے بیلٹ اینڈ روڈ فورم کی سائیڈ لائن پر ملاقات ہوئی جس میں پاک کینیا تعلقات اور باہمی دلچسپی کے امور پر گفتگو کی گئی۔

دوران ملاقات نگران وزیرِ اعظم نے کینیا کے صدر سے پاکستانی صحافی ارشد شریف شہید کے قتل پر گفتگو کی اور اسپیشل جے آئی ٹی کو رپورٹ کو جلد حتمی شکل دینے میں سہولت فراہم کرنے کی درخواست کی۔

اس موقع پر دونوں رہنماؤں نے پاکستان اور کینیا کے مابین مختلف شعبوں میں تعاون کے فروغ پر گفتگو کی اور تجارت، سرمایہ کاری، تعلیم اور عوام کے روابط کے حوالے سے تعاون بڑھانے پر اتفاق کیا۔

اس کے علاوہ ملاقات میں اقتصادی تعاون کو فروغ دے کر دونوں ممالک کے مابین تجارت کی استعداد سے بھرپور فائدہ اٹھانے پر بھی اتفاق کیا گیا۔

نگران وزیراعظم نے کہا کہ پاکستان کینیا کے ساتھ مزید ترقیاتی منصوبوں و اقدامات پر تعاون کا خواہاں ہے ۔

دوسری جانب کینیا کے صدر نے پاکستان کے زرعی اور صحت کے شعبے میں تجربے سے استفادہ حاصل کرنے کی خواہش کا اظہار کیا اور نگران وزیرِ اعظم کو کینیا کا دورہ کرنے کی دعوت دی۔

بعدازاں نگران وزیرِ اعظم انوار الحق کاکڑ نے بھی کینیا کے صدر کو جلد پاکستان کے دورے کی دعوت دی۔

نگران وزیراعظم کی اہم ملاقاتیں

چین کے دورے کے دوران نگران وزیراعظم انوار الحق کاکڑ کی روس کے صدر پیوٹن سے ملاقات طے ہوگئی، تاہم  نگران وزیراعظم کی روس کے صدر ملاقات آج ہوگی۔

ذرائع نے بتایا ہے کہ چین کے صدر شی جن پنگ آج مہمانوں کے اعزاز میں استقبالیہ دیں گے، تاہم  نگران وزیر اعظم چین کے صدر کی دعوت پر منعقدہ استقبالیہ میں شرکت کریں گے۔

ذرائع کے مطابق استقبالیہ کے بعد نگران وزیر اعظم انوار الحق کاکڑ کی روس کے صدر پیوٹن سے  ون آن ون ملاقات ہوگی۔

یاد رہے کہ نگران وزیر اعظم انوار الحق کاکڑ 4 روزہ دورے پر چین میں موجود ہیں، تاہم انوار الحق کاکڑ آج بیجنگ میں مصروف دن گزاریں گے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/944195/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/pakistan/2023/10/944195/amp/ اور حالات سے باخبر رہیں