کراچی کے جناح انٹرنیشنل ایئرپورٹ پر پان، چھالیہ، گٹکے اور سگریٹ نوشی پر پابندی لگانے کا فیصلہ کیا گیا ہے۔

تفصیلات کے مطابق پاکستان سول ایوی ایشن (سی سی اے) انتظامیہ کی جانب سے کراچی ایئرپورٹ کی ٹرمینل بلڈنگ کے اندر پان، چھالیہ، سگریٹ نوشی اور نسوار کھانے والوں کے خلاف ایکشن لینے کا فیصلہ کیا گیا ہے۔

اس حوالے سے سول ایوی ایشن اتھارٹی نے ایئرلائنز سمیت تمام کمپنیوں کے ملازمین کو احکامات جاری کردیے جس میں پان، چھالیہ، گٹکے اور سگریٹ نوشی پر پابندی کے حوالے سے آگاہ کیا گیا ہے۔

سی اے اے کی جانب سے جاری احکامات میں کہا گیا ہے کہ اس پابندی کا اطلاق 6 نومبر سے ہوگا، تاہم پان، گٹگا، چھالیہ کھانے والے ملازمین کے ایئرپورٹ انٹری پاس منسوخ کیے جائیں گے اور انکے خلاف ایک ہزار جرمانہ بھی ہوگا۔

سی اے اے کے احکامات کے مطابق ایئرپورٹس سیکیورٹی فورس (اے ایس ایف) اور سول ایوی ایشن اتھارٹی ویجیلنس کو سخت نگرانی کی ہدایت کردی گئی ہے۔

سی اے اے حکام نے بتایا ہے کہ ایئرپورٹ انتظامیہ کو ایئرپورٹ کی لفٹس، برآمدوں سمیت ٹرمینل بلڈنگ میں پان گٹکے تھوکنے کے نشانات ملے جس کے بعد پابندی کا فیصلہ کیا گیا۔

تمباکو نوشی کے نقصانات

تمباکو (سگریٹ، پان، چھالیا، گٹکا، ای سگریٹ وغیرہ) کا استعمال ایک وبا کی طرح مسلسل بڑھ رہا ہے، تاہم دنیا میں ایک ارب آبادی تمباکو نوشی کی عادت میں مبتلا ہے۔

ان میں سے 80 فیصد لوگوں کا تعلق کم اور درمیانی آمدنی والے ممالک میں سے ہے، یہ امر قابل توجہ ہے کہ جہاں ایک طرف تمباکو استعمال کرنے والوں کی تعداد بڑھ رہی ہے ، وہیں زیادہ آمدنی اور اعلیٰ درمیانی آمدنی والے ممالک میں تمباکو کی مصنوعات کی مجموعی کھپت میں کمی آرہی ہے، جو کہ یہ ظاہر کرتا ہے کہ مسلسل کوشش کے ذریعے، لوگوں کو تمباکو کے مضر اثرات کی آگاہی دینے سے، اس کا پھیلاؤ روکا یا محدود کیا جا سکتا ہے۔ یعنی تمباکو نوشی سے بچاؤ بالکل ممکن ہے۔

اس بات کے ناقابل تردید شواہد موجود ہیں کہ تمباکو استعمال کرنے والے کو تو نقصان پہنچتا ہی ہے، بلکہ یہ اس کے خاندان اور ساتھ رہنے والے لوگوں کے لیے بہت نقصان دہ ہے۔

حکومت کی جانب سے تمباکو نوشی کی عادت کی حوصلہ شکنی کے لیے کئی قوانین بنائے گئے ہیں لیکن صرف قانون بنا دینا کافی نہیں، حکومت کی یہ بھی ذمہ داری ہے کہ وہ ان قوانین پر عمل درآمد کو بھی یقینی بنائے۔ بطور شہری ہماری بھی یہ ذمہ داری ہے کہ ہم قوانین کا احترام کریں اور دوسروں کے لیے کوئی بھی بری مثال قائم نہ کریں، کم از کم عوامی جگہیں یعنی دفتر، ہوٹل، بسیں، شادی ہال وغیرہ میں سگریٹ کے استعمال سے پرہی کریں تاکہ دوسرے لوگ محفوظ رہ سکیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/10/962775/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/pakistan/2023/10/962775/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں