سندھ کے 16 اضلاع میں اتوار (آج) 26 یونین کونسلز کی نشستوں پر ضمنی بلدیاتی انتخابات کیلئے پولنگ کا سلسلہ جاری ہے۔

تفصیلات کے مطابق سندھ کے 16 اضلاع میں ضمنی بلدیاتی انتخابات کیلئے پولنگ ہو رہی ہے، تاہم پولنگ کا عمل صبح 8 بجے شروع ہوچکا ہے جو شام 5 بجے تک بغیر کسی وقفے کے جاری رہے گا۔

کراچی میں چیئرمین، وائس چیئرمین اور جنرل ممبر کی 9 نشستوں پر پولنگ جاری ہے، تاہم 9 نشستوں پر پیپلز پارٹی، جماعت اسلامی اور پی ٹی آئی سمیت 54 امیدوار میدان میں ہیں۔

اس کے علاوہ ضلع ملیر، ضلع کیماڑی، ضلع جنوبی میں چیئرمین کی نشستوں پر انتخابات ہورہے ہیں جبکہ ضلع ملیر اور ضلع جنوبی میں وائس چیئرمین کی نشستوں پر بھی پولنگ جاری ہے۔

ضمنی انتخاب والے حلقوں میں رجسٹرڈ ووٹرز کی تعداد 2 لاکھ 6 ہزار 686 ہے جبکہ شہر قائد میں 121 پولنگ میں سے تمام کو حساس اور انتہائی حساس قرار دیا گیا ہے۔

دوسری جانب الیکشن کمیشن سیکرٹریٹ میں سندھ کے 16 اضلاع میں ہونے والے ضمنی بلدیاتی انتخابات کی نگرانی کیلئے 3 روز کے لئے کنٹرول روم اور شکایت سیل قائم کر دیا گیا ہے۔

ترجمان کے مطابق مرکزی کنٹرول روم انتخابی عمل کی مانیٹرنگ، شکایات کے ازالے کے لئے قائم کیا گیا ہے، تاہم کنٹرول روم انتخابات کے نتائج مرتب ہونے تک کام کرتا رہے گا اور مرکزی کنٹرول روم میں افسران مانیٹرنگ ٹیم کے ساتھ انتخابی عمل کی نگرانی کریں گے۔

ترجمان نے مزید بتایا کہ مرکزی کنٹرول روم میں انتخابی عمل کے حوالے سے شکایات کا فوری ازالہ بھی کیا جائے گا جبکہ کنٹرول روم پولنگ کا عمل شروع ہونے سے ابتدائی نتائج کے مرتب ہونے تک کام کرتا رہے گا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/11/136563/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/11/136563/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں