وزارت ماحولیاتی تبدیلی نے خطرے کی گھنٹی بجا دی ہے۔

تفصیلات کے مطابق وزارت نے جاری کردہ دستاویز میں بتایا کہ ماحولیاتی تبدیلی کے پاکستان پر سخت اثرات مرتب ہونگے، پچھلی ایک دھائی سے ملک میں مون سون کی بارشوں میں اضافہ ہوا، ملک میں 2025 تک پانی کی کمی کا خدشہ ہے۔

دستاویز کے مطابق ملک میں 2050 تک غذائی قلت چالیس سے ساٹھ فیصد تک پہنچ سکتی ہے، ساحل سمندر میں دو سے تین فٹ تک اضافہ ہو سکتا ہے، ساحل سمندر میں اضافے سے 2100 تک کراچی بدین اور ٹھٹھہ شہروں کے وجود خطرے میں پڑ سکتے ہیں۔

ادارے نے کہا کہ حکومت ان خطرات سے آگاہ ہے اور ان کے تدارک کے لئے اقدامات کر رہی ہے۔

دوسری جانب کچھ روز قبل نگران وزیراعظم انوار الحق کاکڑ نے نیشنل ایمرجنسی آپریشن سینٹر کا افتتاح کرتے ہوئے کہا کہ نیشنل ایمرجنسی آپریشن سینٹر این ڈی ایم اے ہیڈ کوارٹر میں قائم کیا گیا ہے، آپریشن سینٹر مستقبل میں قدرتی آفات کی منیجمنٹ اور خطرات میں کمی کے لیے اہم ثابت ہوگا۔

نگران وزیراعظم نے قدرتی آفات سے محفوظ بنیادی ڈھانچے اور پالیسی فریم ورک پر زور دیا اور کہا کہ کاربن کے اخراج میں حصہ کم ہونے کے باوجود موسمیاتی تبدیلیوں سے سب سے زیادہ متاثر ہونے والے ممالک میں شامل ہیں۔

انوار الحق کا کہنا تھا کہ موسمیاتی تبدیلی ایک حقیقی چیلنج ہے، ٹھوس اقدامات نہ اٹھائے تو یہ چیلنج آنے والی نسلوں کو بھی خوف میں مبتلا کیے رکھے گا۔

ان کا یہ بھی کہنا تھا کہ گزشتہ سال شدید سیلاب کے باعث ملک کی ایک تہائی آبادی متاثر ہوئی جبکہ گزشتہ سال سیلاب کے باعث ملک کو 30 ارب ڈالر تک کا نقصان اٹھانا پڑا۔

نگران وزیراعظم انوار الحق کاکڑ کا مزید کہنا تھا کہ دنیا موسمیاتی تبدیلیوں کے اثرات سے نمٹنے میں پاکستان جیسے ترقی پذیر ممالک کی مدد کیلئے آگے بڑھے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/pakistan/2023/11/332634/amp/ کو لائک کریں

ٹوئٹر پر ہمیں فولو کریں https://www.bolnews.com/urdu/pakistan/2023/11/332634/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں