اسپارک کے پروگرام مینیجرڈاکٹر خلیل احمد ڈوگر نے کہا ہے کہ تمباکو کمپنیوں کی شمولیت کیلئے ٹریک اینڈ ٹریس سسٹم کو وسعت دینے کی ضرورت ہے۔

 تفصیلات کے مطابق بچوں کے حقوق کیلئے کام کرنے والی غیر سرکاری تنظیم اسپارک کے پروگرام مینیجرڈاکٹر خلیل احمد ڈوگر نے کہا ہے کہ تمباکو کمپنیوں کی شمولیت کے لیے ٹریک اینڈ ٹریس سسٹم کو وسعت دینے کی ضرورت ہے جس سے قومی خزانے کو 30 سے40 ارب کی بچت متوقع ہے۔

انہوں نے کہا کہ اس سے نہ صرف غیر قانونی تجارت کو روکنے میں مدد ملے گی بلکہ تمباکو کی مصنوعات کے نقصانات سے پاکستانی بچوں کے تحفظ اور صحت عامہ کے لیے درکار سرمایہ کی وصولی میں بھی مدد ملے گی۔

  خلیل احمد ڈوگر نے کہا ہے کہ مارکیٹ میں اسمگل شدہ مصنوعات کے پھیلاؤ کے بارے میں تمباکو کی صنعت کے دعوے حقیقت سے مطابقت نہیں رکھتے۔ درحقیقت، اسمگل شدہ اشیاء کی شرح  صنعت کے دعوے کے مقابلے میں نمایاں طور پر کم ہے۔

اسپارک کے پروگرام مینیجر نے کہا کہ زیادہ تر مصنوعات جن پر غیر قانونی تجارت کا لیبل لگایا جاتا ہے، درحقیقت ٹیکس چوری کی مشق کا نتیجہ ہے۔ یہ عمل نہ صرف ملکی معیشت کو نقصان پہنچاتا ہے بلکہ تمباکو کی مصنوعات کو مزید قابل رسائی بنا کر بچوں کی فلاح و بہبود کے لیے بھی براہ راست خطرہ بنتا ہے۔

انہوں نے کہا کہ یہ معاشرے کی اجتماعی ذمہ داری ہے کہ وہ اس بات کو یقینی بنائے کہ تمباکو کی مصنوعات ہمارے نوجوانوں کے ہاتھوں میں نہ جائیں۔

اس حوالے سے کمپین فار ٹوبیکو فری کڈز کے کنٹری ہیڈ ملک عمران احمد نے ٹریک اینڈ ٹریس سسٹم کو تقویت دینے کی اہمیت پر روشنی ڈالتے ہوئے اس بات پر زور دیا کہ تمباکو کی غیر قانونی تجارت کا مقابلہ اور صحت عامہ کا تحفظ خاص طور پر بچوں کی صحت کو محفوظ کرنا اولین ترجیح ہونی چاہیے۔

انہوں نے پاکستان کی قومی آمدنی پر تمباکو کی صنعت کے منفی اثرات کی طرف توجہ مبذول کرائی اور صنعت کی کم رپورٹنگ اور پیداواری اعداد و شمار میں ہیرا پھیری پر روشنی ڈالی، جس کے نتیجے میں قومی خزانے کو 615 بلین کا زبردست نقصان ہوا۔

عمران احمد نے وضاحت کی کہ یہ نقصان صحت کی دیکھ بھال اور تعلیم جیسی اہم خدمات میں سرمایہ کاری کرنے کی ملک کی صلاحیت کو بری طرح متاثر کرتا ہے، جو ہمارے شہریوں بالخصوص بچوں کی فلاح و بہبود کے لیے بنیادی ہیں۔