نگران وزیراعظم انوارالحق کاکڑ کی زیرصدارت بجلی چوری روکنے کی مہم کی پیشرفت پر جائزہ اجلاس ہوا جس میں نگراں وزیراعظم کو مہم کے آغاز سے لے کر اب تک کے بجلی چوری روکنے سے متعلق نتائج کے حوالے سے بریفنگ دی گئی۔

بریفنگ دیتے ہوئے کہا گیا کہ وفاقی اورصوبائی حکومتوں کے اشتراک سے مہم کامیابی سے جاری ہے، مہم میں 19415 بجلی چوروں گرفتار کیا گیا۔

بریفنگ دیتے ہوئے یہ بھی کہا گیا کہ ستمبر سے بجلی چوری کے خلاف 39836 ایف آئی آر درج کی جا چکی ہیں، بجلی چوری میں ملوث 189 سرکاری افسران کو معطل کیا جا چکا ہے۔

بریفنگ دیتے ہوئے مزید کہا گیا کہ مردان میں انسداد بجلی چوری مہم سب سے زیادہ کامیاب رہی، مردان میں بجلی چوری کی شرح 43 سے کم ہوکر 13 فیصد تک آ چکی ہے، مہم کے دوران اربوں روپے کی وصولیاں کی جا چکی ہیں۔

اجلاس کی صدارت کرتے ہوئے نگراں وزیراعظم انوارالحق کاکڑ نے مہم کے مثبت نتائج آنے پر وزارت توانائی، بجلی کی تقسیم کار کمپنیوں اور متعلقہ وفاقی و صوبائی حکام کی کارکردگی کو سراہا۔

نگراں وزیراعظم نے متعلقہ حکام کو آزاد جموں و کشمیر، کوئٹہ اور سندھ میں انسداد بجلی چوری کی کوششوں کو تیز کرنے کی ہدایت کی جبکہ نگراں وزیراعظم نے زرعی ٹیوب ویلوں کی شمسی توانائی پر منتقلی کے عمل کو تیز کرنے کی بھی ہدایت کی۔

انوار الحق نے متعلقہ حکام کو بلوچستان میں بجلی چوری روکنے کی مہم کے خلاف مزاحمت اور دیگر مسائل کے حوالے سے ایک جامع رپورٹ پیش کرنے کی ہدایت کی۔

نگراں وزیراعظم انوارالحق کاکڑ نے مزید کہا کہ ہماری ذمہ داری ہے کہ ہماری ذمہ داری ہے کہ بجلی چوری روکنے کی مہم جیسے اقدامات کے ذریعے آئندہ جمہوری حکومت کے لیے ایک مستحکم نظام تشکیل دیں۔

دوسری جانب کراچی والوں کیلئے سہ ماہی ایڈجسٹمنٹ کی مد میں بجلی مہنگی کرنے کی منظوری دیدی گئی ہے۔

نگراں وزیر خزانہ ڈاکٹر شمشاد اختر کی صدارت میں ای سی سی کا اجلاس ہوا جس میں کے الیکٹرک کیلئے یکساں ٹیرف کے تحت کراچی والوں کیلئے بجلی مہنگی کرنے کی منظوری دے دی گئی ہے۔

صارفین سے 46 پیسے فی یونٹ کی اضافی وصولیاں آئندہ 3ماہ میں کی جائیں گی۔

وزارت خزانہ کے مطابق پی ایس او کے مالی بحران سے نمٹنے کیلئے 100 ارب روپے کی حکومتی گارنٹی منظور کر لی گئی جبکہ پنجاب کیلئے گرین کارپوریٹیو اقدامات کی مد میں وفاقی حکومت 20 ارب روپے فراہم کرنے کی منظوری بھی دی گئی ہے جس کیلئے ای سی سی نے صوبائی حکومت کو گرین انشیٹیو کمپنیوں سے براہ راست اس ضمن میں رابطہ کرنے کی ہدایت کی ہے۔

وزارت خزانہ کے مطابق چمن بارڈر پر یومیہ اجرت پر کام کرنے والے مزدوروں کو مشاورت کے ساتھ بی آئی ایس پی پروگرام میں شامل کرنے کی ہدایت کی گئی ہے اور وزارت داخلہ کیلئے تعمیر و مرمت کے کام کیلئے 4 کروڑ 74 لاکھ روپے جبکہ وزارت آئی ٹی کے ڈیجیٹل انفارمیشن انفراسٹرکچر منصوبے کیلئے 5 ارب روپے کی منظوریاں دی گئیں ہیں۔