اسلام آباد: وفاقی کابینہ کی جانب دو اہم فیصلوں کی منظوری دے دی گئی۔

تفصیلات کے مطابق وفاقی کابینہ نے ملائیشیا کے ساتھ دفاعی تعاون بڑھانے اور جسٹس ریٹائرڈ مظہر عالم خان میاں خیل کو اہم عہدے پر تعینات کرنے کی منظوری دے دی۔

ذرائع نے بتایا کہ وفاقی کابینہ کی جانب سے وزارت دفاع کو ملائیشیا کے ساتھ 1997 کے معاہدے میں ترمیم کی اجازت دے دی گئی اور جسٹس ریٹائرڈ مظہر عالم خان میاں خیل کو اہم عہدے پر تعینات کرنے کی منظوری دی گئی۔

ذرائع کا کہنا تھا کہ جسٹس ریٹائرڈ مظہر عالم خان میاں خیل کو چیئرمین ایپلٹ ٹربیونل مسابقتی کمیشن تعینات کرنے کی منظوری دی گئی۔

اس کے علاوہ جسٹس ریٹائرڈ مظہر عالم خان میاں خیل 68 سال کی عمر تک خدمات انجام دیں گے۔

ذرائع کے مطابق مسابقتی کمیشن کا ایپلٹ ٹربیونل 17 جولائی سے غیر فعال تھا، تعیناتی کے بعد اربوں روپے جرمانے کے کیسز نمٹائے جا سکیں گے۔

ذرائع نے مزید بتایا کہ وفاقی کابینہ نے فیصلوں کی سمری سرکولیشن کے ذریعے منظوری دی۔

دوسری جانب وفاقی کابینہ نے سابق وزیر اعظم کا کرپشن کیس کا ٹرائل اڈیالہ جیل میں کرنے کی بھی منظوری دے دی۔

ذرائع کے مطابق وزرات قانون کی سمری پر وفاقی کابینہ سے سرکولیشن کے ذریعے منظوری لی گئی تاہم 190 ملین پاونڈ کیس کا ٹرائل احتساب عدالت اڈیالہ جیل میں کرے گی۔

ذرائع کا کہنا تھا کہ نیب کی ٹیم 190 ملین پاونڈ اسکینڈل کی تحقیقات تقریباً مکمل کر چکی ہے، جلد ریفرنس دائر ہو گا جبکہ کیس میں ضمانت کا معاملہ بھی احتساب عدالت اڈیالہ جیل میں سنے گی۔

یاد رہے کہ نیب کی جانب سے امن و امان کی صورت حال کے پیش نظر اڈیالہ جیل میں عدالت کے قیام کی سفارش کی گئی تھی۔