پاکستان پیپلز پارٹی کے رہنما حسن مرتضیٰ نے کہا ہے کہ پاکستان کو ایٹمی طاقت ذوالفقار علی بھٹو شہید نے بنایا تھا۔

تفصیلات کے مطابق پاکستان پیپلز پارٹی کے رہنما حسن مرتضیٰ نے اپنے ایک بیان میں کہا کہ ن لیگ نے منی لانڈرنگ کے بعد پراجیکٹ لانڈرنگ بھی شروع کردی ہے، قائد مسلم لیگ ن کی جانب سے تھرکول بجلی منصوبوں کا کریڈٹ لینا فریب ہے، نواز شریف خود فریبی کا شکار ہیں۔

حسن مرتضیٰ نے کہا کہ دنیا جانتی ہے کہ پاکستان کو ایٹمی طاقت ذوالفقار علی بھٹو شہید نے بنایا، پاکستان کو ایٹمی طاقت بنانے کا جرم بھٹو شہید کو تختہ دار تک لے گیا، نوازشریف ایٹمی پروگرام کا کریڈٹ لینے کی بھی ناکام کوشش کرتے رہے۔

انہوں نے کہا کہ سی پیک اور گوادر پورٹ آصف علی زرداری کا منصوبہ تھا، ایٹمی پروگرام کے بعد تھر کول پاور پراجیکٹ کو ن لیگ اپنے کھاتے ڈالنے کی کوشش کر رہی ہے، تھر کول پاور پراجیکٹ 1995 میں بینظیر بھٹو شہید نے شروع کیا، نوازشریف نے اقتدار میں آکر تھرکول پاور پراجیکٹ کو بند کردیا، نوازشریف اور مشرف دور میں تھر کول پاور پراجیکٹ پر کام مکمل بند رہا، اٹھارویں ترمیم کے بعد پیپلزپارٹی کی سندھ حکومت نے تھرکول پاور پراجیکٹ دوبارہ شروع کیا۔

پاکستان پیپلز پارٹی کے رہنما حسن مرتضیٰ کا کہنا تھا کہ نوازشریف کی منی لانڈرنگ تو قوم برداشت کرسکتی ہے لیکن پراجیکٹ لانڈرنگ کرنے کی اجازت ہرگز نہیں دیں گے، پیپلزپارٹی کے پراجیکٹس کو اپنے کھاتے ڈالنا ن لیگ کا قانونی اور اخلاقی جرم ہے، نوازشریف ملک کو کچھ نہیں دے سکتے تو کم از کم پیپلزپارٹی کے پراجیکٹس کو اپنے نام کرنا بند کریں۔