چیف آف آرمی اسٹاف جنرل سید عاصم منیر نے کہا ہے کہ پاک فوج ہر قسم کے چیلنجز کے سامنے پاکستان کی علاقائی سالمیت اور خودمختاری کے دفاع کے لیے پوری طرح تیار ہے۔

پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے خیرپور ٹامیوالی  کا دورہ کیا جس کے دوران انہوں نے بہاولپور کور کی فیلڈ ایکسرسائز کا مشاہدہ کیا۔

آرمی چیف کو بہاولپور کور کی فیلڈ ایکسرسائز پر بریفنگ دی گئی اور آپریشنل ماحول میں مستقبل کے چیلنجز سے نمٹنے کے لئے پیشہ وارانہ مہارت میں اضافے کے لئے مشق سے آگاہ کیا گیا۔

اس موقع پر آرمی چیف کو میدان جنگ میں مختلف سطح پر مہارت کے حصول سے بھی آگاہ کیا گیا جس کے بعد انہوں نے انٹیگریٹڈ فائر سمیت مختلف جنگی چالوں کا بھی مشاہدہ کیا۔

آرمی چیف کی جوانوں کی پیشہ ورانہ مہارت، آپریشنل تیاریوں اور بلند حوصلے کی تعریف کرتے ہوئے کہا کہ ہر حال میں روایتی جوش و ولولے کے ساتھ قوم کی خدمت کرتے رہیں گے، ملک کو درپیش چیلنجز سے بخوبی واقف ہیں، قوم کی حمایت سے وطن دشمنوں کے مذموم عزائم کو ناکام بنانے کے لیے تیار ہیں، پاک فوج ہر قسم کے چیلنجز کے سامنے پاکستان کی علاقائی سالمیت اور خودمختاری کے دفاع کے لیے پوری طرح تیار ہے۔

آرمی چیف نے کہا کہ پاک فوج کی پوری توجہ مادر وطن کی سرحدوں کے خطرات کے خلاف دفاع پر مرکوز ہے، قوم کی حمایت سے مسلح افواج پاکستان کے دشمنوں کو شکست دیں گی۔